Оқушылар депоға экскурсия жасады
"Қазақстан теміржолшысы" газетінің Жамбыл облысындағы меншікті тілшісі
Тараз қаласындағы №41 орта мектептің оқушылары «Қамқор Локомотив» ЖШС филиалының Тараз локомотив жөндеу депосына экскурсия жасап, сала мамандарының жұмысымен танысты.
Бұл – Тараз теміржол көлік және коммуникация колледжінің өндірістегі әлеуметтік әріптестерімен бірлескен жобасы. Мақсат – жас жеткіншектерге кәсіптік бағдар беру.
– Көбінде колледжге оқуға түсуге 9-сынып оқушылары келетіні белгілі. Мемлекеттік тапсырыс шеңберінде кәсіптік-техникалық, жұмысшы мамандықтарға грант көп бөлінеді. Ал 9-сыныптан кейін грант иегері атануға мүмкіндік жоғары. Сондықтан біз жыл бойы мектептерді аралап, жас жеткіншектерге кәсіптік бағдар беріп отырамыз. Мектеп – колледж – жұмыс беруші: үшжақты келісім бойынша өндіріс орындарына экскурсия ұйымдастырамыз. Бүгінгі оқушы – ертеңгі колледж түлегі, болашақ теміржолшы, – дейді колледж директорының оқу-өндіріс жөніндегі орынбасары Жеңіс Тайбеков.
«Жұмысшы мамандықтар жылы» аясында бекітілген іс-шаралар жоспарына сай өткізілген танымдық сабаққа 9-сыныпта оқитын 20 оқушы қатысты. Экскурсия барысында жас жеткіншектер кәсіпорынның жұмысымен танысып, өндіріс саласындағы мамандықтар туралы мол мәлімет алды. Депо мамандары оларға өз мамандықтары туралы әңгімелеп, маңыздылығын түсіндірді.
Жалпы танымдық экскурсиялар оқушыларға болашақ кәсібін саналы түрде таңдауға көмектесетіні анық. Жасөспірімдерге еңбек нарығындағы сұранысқа ие мамандықтармен жақынырақ танысуға мүмкіндік туады.
Статистикаға сүйенсек, оқушылардың 70 пайызы мамандық таңдай алмайды екен. Ал болашақ бағытыңды айқындап, белгілі бір кәсіп иесі атану үшін келешекте қандай мамандарға сұраныс артатынын біліп алу артықтық етпейді.
