Теміржолшылар экологиялық акцияға үн қосты

Елдегі экологиялық жағдайды жақсартуға бағытталған. Қызылорда ЖТ бөлімшесіне қарасты Қазалы вагон пайдалану депосының теміржолшылары өткен сенбіде жеті бірдей станцияда бір мезгілде сенбілік ұйымдастырып, «Таза Қазақстан» жалпыұлттық акциясына үн қосты.

 Ел аумағындағы экологиялық мәдениетті арттырып, қоршаған ортаға жанашырлықпен қарауға үндейтін маңызды бастамаға орай депоның барлық станциясындағы техникалық қызмет көрсету пункттерінде  бір мезетте сенбілік жұмыстары үйлестіріліп, өздеріне жүктелген аумақта ауқымды тазалық жұмыстары жүргізілді.

Қоғамдық жұмыстарға белсене араласу – Құрметті теміржолшы Арғын Орымбаев басқаратын Қазалы вагон пайдалану депосы ұжымының басты ерекшеліктерінің бірі. Олар үнемі өңірде өтетін түрлі шаралардың алдыңғы қатарында жүріп, белсенділіктерімен ерекшеленеді. Бұл жолы да Қазалы, Сексеул, Арал теңізі, Төретам, Жосалы, Қызылорда және Шиелі бекеттерінде бір мезгілде басталған сенбілік аясында қыруар жұмыс атқарды: теміржол бойындағы бекітілген аймақтар мен депо ауласы, жан-жағы күл-қоқыс пен тұрмыстық қалдықтардан тазаланып, тал-дарақтардың түбі қопсытылып, арықтар аршылды.    

Бұл сенбілік тек экологияны жақсартуға ғана емес, ұжымның бірлігін нығайтуға да бағытталған. Вагон қараушылардың барлық станцияда бір уақытта жұмысқа кірісуі – теміржолшылар арасындағы ауызбіршіліктің, тиянақтылық пен еңбекке деген адалдықтың нақты көрінісі болды. Бұл бастама – тек Қазалы вагон пайдалану депосы үшін ғана емес, жалпы өңірдегі барлық теміржол мекемелері үшін өнеге боларлық іс.

«Біздің депо ұжымы үшін сенбілік өткізу қалыпты жағдай. Әсіресе көктем мен күзде тазалық жұмыстарына белсенді атсалысамыз. Бұл жолы ойласа келе барлық пунктте бір мезгілде өткізуді жоспарладық. Әрине мұны мақтан үшін емес, үлгі болу үшін жасаймыз», – дейді депоның цехком төрағасы Бақытжан Ибрайым.