Түлектерге кәсіби бағдар берілді
"Қазақстан теміржолшысы" газетінің Жамбыл облысындағы меншікті тілшісі
Қайда жұмысқа орналасуға болады? Біліктілікті арттыру үшін қандай курстарды оқыған дұрыс? Осы секілді сұрақтардың жауабын біліп, бағыт алу үшін мектеп бітірушілерге ғана емес, колледж, жоғары оқу орындарының түлектеріне де кәсіби бағдар керек.
Жақында ғана дипломдарын қолға алған түлектер және ата-аналарымен Тараз теміржол көлік және коммуникация колледжінде кездесу өтті. Жиында Тараз көліктегі оқу орталығының директоры Лашынкүл Күзербаева жас мамандарға кеңес берді.
Кездесуге негізінен «Теміржолдың жылжымалы тартқыш құрамын пайдалану, жөндеу және техникалық қызмет көрсету» (біліктілігі: локомотив машинисының көмекшісі) мамандығы бойынша бітіруші түлектер қатысты.
Лашынкүл Күзербаеваның айтуынша, орталықта бітіруші түлектер машинист көмекшісін дайындаудың 10 айлық курсын оқи алады.
– Оқу бағдарламасы бойынша кәсіптік білім алудың, колледжде алған білімді практикада шыңдаудың мүмкіндігі мол. Сондай-ақ «ҚТЖ» ҰК» АҚ кәсіпорындарында еңбек ете алады. Қазіргі кезде жұмысқа орналасуға өтінім беру, құжат қабылдау автоматты түрде электронды жүйеде жүргізіледі, - деді Тараз көліктегі оқу орталығының директоры.
Лашынкүл Рахымқызы жүргізуші көмекшісін даярлаудың 10 айлық бағдарламасының мазмұны, оқу шарттары, оқуға түсу талаптары және курсты аяқтағаннан кейінгі мансаптық перспективаларына тоқталды. Түлектер аталған бағдарлама бойынша оқуға қызығушылық танытып отыр.