«Білім экспресі» Абай елінде

Өткен аптаның соңында Семей қаласында осы жылы алғаш рет «Білім экспресі» ішкі тренерлер жобасы бойынша кезекті басқосу өтті. Екі күнге созылған жұмыстар барысында аймақтағы жүзге жуық теміржолшы арнайы даярлықтан өтіп, сертификат алды.    

Биылғы жылғы тақырыптар күйзеліске төзімділік, кикілжіңді басқару, эмоционалдық интеллект, тиімді коммуникациялар атаулары аясында өрбіді. Семинар-тренинг түріндегі дәрістерді Астана қаласынан келген мамандар – «ҚТЖ» ҰК» АҚ Адами ресурстарды басқару департаментінің бизнес-серіктесі Алма Сәулебаева мен Гүлнар Катаева және Семей ЖТ бөлімшесінен жергілікті ішкі тренерлер Қазбек Смағұлов пен Бекзат Кәрімханов жүргізді. 

– Бұл өткізіліп отырған тренингтерге ұзақ даярландық. Теміржолшылар күнделікті қызмет барысында ғана емес, тұрмыста да түрлі оқиғаларға тап болып жатады. Ондайда ерік-жігерді басқарып, сезімді ақылға жеңдірудің маңызы аса зор. Ұлттық компанияның басты құндылығы оның қызметкерлері десек, олардың стреске төзімді, коммуникациялық қабілеттері зор болуы тиіс. Біздің көздеген мақсатымыз да осы, – дейді ішкі тренер Бекзат Нұрланұлы.

Тоқтала кетсек, тренингтер барысындағы тағы бір негізгі міндет – қызметкерлердің біліктілігін арттыру, өз бетінше білім алуын қолдау, корпоративтік мәдениет деңгейін арттыру, білім базасын жаңарту. Соның нәтижесінде компанияда пойыздар қозғалысы және еңбек қауіпсіздігін, еңбек өнімділігін, компания тиімділігін арттыру күтіледі.  

Айта кетерлігі, екі күнге созылған семинар-тренингтер мемлекеттік тілде өткізілді. Ал бағдарлама барысында тақырып аясындағы танымдық-тағылымдық мәні зор бейнероликтер көрсетілді. Қызу пікірталас та өрбіді.

Тренингтердің соңында барша қатысушыларға НЖС-6 бастығының орынбасары Дәурен Батталов пен кадр бөлімінің басшысы Данияр Баймағұлов салтанатты түрде арнайы сертификаттар табыстады.