Маңғыстау магистральдық желісінде 17 нысанға жөндеу жұмыстары жүргізілуде
Маңғыстау облысы бойынша меншікті тілші
Биыл Маңғыстау магистральдық желі бөлімшесіне қарасты бірқатар нысан жаңартылады. Қазір бөлімше бойынша жер-жерде түрлі мақсатта қолданылып жүрген ғимараттар ағымдық жөндеуден өткізіліп жатыр.
Бөлімше аумағындағы 17 ғимаратты ағымдық жөндеуден өткізу межесі бар. Бүгінде 11 ғимаратта жөндеу жұмыстары жүргізілуде. Қалған алты ғимараттағы қажетті жұмыстар жөндеуші мекемемен келісімшарт жасақталып, тиісті құжаттар дайындалғаннан кейін басталады деп күтілуде.
Оған қоса биылғы сәуір-маусым айларында бөлімшеде жұмысшылар игілігі үшін модульдік типтегі 4 нысан орнатылып, төртеуі де қолданысқа берілді. Олар Бейнеу жол дистанциясы бойынша Ноғайды және Маңғыстау жол дистанциясынан Жаңаөзен, Шетпе станциясы мен Боздақ бекеттеріне қойылған.
Бұл туралы ақпарат берген бөлімшенің ғимараттар мен инженерлік жүйе бөлімінің басшысы Нұржан Мүсірхановтың айтуынша, 17 нысанның үшеуі Бейнеу жол дистанциясы, алтауы Маңғыстау жол дистанциясы, қалғаны Маңғыстау белгі беру және байланыс дистанциясына тиесілі өндірістік-шаруашылық мақсатта қолданылатын ғимараттар.
– Биылғы жөнделетін нысандар қатарына Бейнеу жол дистанциясына қарасты гаражды, Сайөтестегі гараждың қоршауы мен қойма үйін алып отырмыз. Бұл жөндеу тізіміне Маңғыстау жол дистанциясына қарасты нысандардан Қарақия және Жетібай станцияларында жұмысшылардың табельдік ғимараттары мен Жаңаөзен, Қарақия, Жетібайдағы гараждар да енген. Болашақ станциясында орналасқан локомотив бригадасының демалыс үйі де ағымдық жөндеуден өтеді.
Сонымен қатар Маңғыстау белгі беру және байланыс дистанциясына қарасты нысандардан да біразы жаңартылады. Сайөтес, Үстірттегі байланыс үйі мен Күйкен және №3, 7, 15 бекеттердегі посттар, Маңғыстау станциясында орналасқан радиоцех пен механикалық шеберхана ғимараттарына да ағымдық жөндеу жүргізіледі. Аталған жөндеу кезінде нысандардағы есік-терезесі, едені, шатыры түгел ауыстырылады. Ішкі және сыртқы қабырғалары аршылып, қайтадан сыланады. Жылыту және тоқ жүйесі ауыстырылады. Жаңа үлгідегі электр жүйесіне қосылған қақпалар қондырылады. Өзге де қажетті жұмыстары істеліп, ғимараттар толықтай жаңартылады, – деп жанжақты ақпар берді Нұржан Мүсірханов.
Естуімізше, бұл нысандар жетпіс-сексенінші жылдары салыныпты. Содан бері жеңіл-желпі сыланып, сырланғанымен толықтай ағымдық жөндеуден өтпеген. Сол үшін қазір ғимараттардың қаңқасына дейін аршылып, қайтадан сыланып, шатыры қайта салынып, түбегейлі жаңарту қарастырылған. Жалпы, аймақта нысандарды жаңарту жұмыстары 2023 жылдан бері жалғасып жатыр. Келесі жылы тағы да отыз шақты нысанға жөндеу жүргізу жоспарда тұр. Қазір олардың «тағдыры» талқыға салынып, ақаулық акті жасақталуда.