Семей теміржол вокзалы жаңғыртылуда

Биыл Семей ЖТ бөлімшесі бойынша «ҚТЖ» ұлттық компаниясы есебінен 10 теміржол вокзалы қайта жаңғыртылады. Соның ішінде әсіресе ең күрделі торап Семей теміржол вокзалына баса мән берілуде.

Қазіргі таңда мұнда Мемлекет басшысының тапсырмасына сәйкес күрделі жөндеу жұмыстары мейлінше қарқынды түрде атқарылуда.  

Бүгінде ауқымды түрде күрделі жөндеу жүріп жатқан вокзалда демонтаж жұмыстары толыққанды аяқталуға таяу. Құрылыс белгіленген мерзімінен кешікпей мейлінше қарқынды жүргізілуде. Әйтсе де, бұлай тоқмейілсуге болмайды. Жоба бойынша жаңғырту жұмыстары ағымдағы жылдың соңғы тоқсанында толық аяқталуы тиіс. Бұл ретте бас мердігер «DK Proekt» ЖШС мен техникалық қадағалаушы «Engineering Service» ЖШС бар мүмкіндікті пайдалануда.  

Қазір билет кассасы, жолаушылардың күту орны, медпункт, желілік полиция бекеті уақытша далада, вокзал іргесіне орналастырылған. Бұлайша тек алғашқы қар жауып, қазан айының қара суығы түскенше ғана амалдауға болады. Яғни қолайсыздық ұзаққа созылмауы тиіс.  

Жобаға сәйкес нысанның сырты заманауи еуро панельдермен қапталып, аумағы кеңейтіледі. Вокзал жанынан жолаушылар мен қарсы алушылардың екінші, үшінші жолдарға жеңіл өтуі үшін эскалатор, мүгедектігі бар адамдарға арналған лифт, шағын буфеттері бар қосымша ғимарат та салынады. Сонымен қатар жүргіншілерге арналған 260 метрлік теміржол үсті көпірі де жаңартылады.  

Мұнымен қатар, жаңғырту жұмыстарына вокзал ғимараты ғана емес, оның алдындағы аумақты қайта қалпына келтіру және жаңарту, инженерлік жүйелерді ауыстыру да кіреді. Жөндеу жұмыстары аяқталғаннан кейін вокзалдың өткізу қабілеті артып, заманауи күту залдары, жоғары жылдамдықтағы интернет, ақпараттық жүйелер және қосымша қызмет түрлері де пайда болмақ.  

Бүгінгі таңда жүргізіліп жатқан барлық құрылыс жұмыстары тапсырыс беруші «ҚТЖ» ҰК» АҚ Вокзал шаруашылығын жаңғырту дирекциясының, Семей ЖТ бөлімшесі басшылығының және жергілікті атқарушы биліктің назарында тұр.