Әлеуметтік ахуал – ерекше назарда
Абай облысы бойынша меншікті тілші
Семей жол дистанциясында ерекше әлеуметтік іс-шара ұйымдастырылды. НЖС-6 бөлімшесінің басшысы Айдын Шәукежановтың тікелей ұйытқы болуымен «Отбасы және теміржол жұмысшыларының қауіпсіздігі» атты тақырыпта айрықша акция өткізілді.
Бұл күні ПЧ-39 мекемесінде еңбек ететін жолшылардың жұбайлары арнайы шақырылды. Дастархан басында еркін түрде өткізілген әңгіменің басты тақырыбы жолшылардың үйдегі көңіл күйі, әлеуметтік ахуалы туралы өрбіді.
Семей магистральдық желі бөлімшесінің бастығы Айдын Мақсұтбекұлы сөз алып, теміржол бойындағы әр қызметкердің жұмыстағы жетістіктері үйдегі қалыптасқан ахуалға тікелей байланысты екендігін әзілмен жеткізіп өтті.
Жалпы, қазіргі таңда дистанция бойынша теміржолшыларға барлық қолайлы жағдай жасалған. Ұлттық компания тарапынан ерекше көңіл бөлінеді. Тек жанұяларындағы әлеуметтік жай-күйіне ғана назар аудару қажет. Бұл орайда теміржолшылардың жұбайларына да сөз берілді. Әйелдер қауымы ерлерінің түздегі қызметтеріне, әсіресе жалақылары мен мерекелер кезінде алатын сыйақыларына ризашылықтарын білдірді. Сонымен қатар қызметтік киімдермен қамту шараларына да тоқталып, «Мектепке жол» сынды әлеуметтік акциялардың де берері мол екенін сөз етті. Мұнымен қоса, теміржолшылар серіктері бөлімше басшысына өтініш-тілектерін де жеткізуге мүмкіндік алды.
– Біздің дистанция бойынша 202 жол монтері еңбек етеді. Жол бойындағы жұмыстардың негізгі салмағы да соларға түседі. Сондықтан олардың үйде де, түзде де жағдайы жасалуына мүдделіміз, – деп атап өткен дистанция басшысы, Құрметті теміржолшы Рахат Ботаспаев жолшылардың дені түрлі марапатқа ие екендігін жеткізді. Бұл орайда желі бойында ұзақ жылдардан бері жемісті еңбек етіп жүрген Тлеубаевтар, Кактеновтер, Мәнанбаевтар, Омаровтар, Тыштыбаевтар, Назарбековтер, Сикимбаевтар, Шурахметовтер, Шуратбаевтар, Едилиповтар сынды бірқатар жолшылар отбасыларына «ҚТЖ» ҰК» АҚ «Магистральдық желі дирекциясы» филиалының директоры С.Рахметовтің алғыс хаты табыс етілді.
Іс-шараның негізгі ұйымдастырушысы НЖС-6 бойынша еңбекті қорғау бөлімінің жетекші инженері Жомарт Шапишевтің айтуынша, мұндай ашық әңгімелердің берері мол. Еңбеккерлердің әлеуметтік ахуалы ұдайы назарда ұсталатын болады.