Тараздағы оқу орталығында машинист-инструкторлар үшін практикалық дәріс өтті
"Қазақстан теміржолшысы" газетінің Жамбыл облысындағы меншікті тілшісі
Қазіргі уақытта Тараз көліктегі оқу орталығында Түркістан, Арыс, Шу, тағы да басқа қалалардан біліктіліктерін арттыруға келген машинист-инструкторлар курстан өтуде.
Жуырда орталықта біліктіліктерін арттыру курсынан өтіп жатқан машинист-нұсқаушылар үшін Жамбыл локомотив пайдалану және «Қамқор локомотив» ЖШС деполарында практикалық дәріс өтті. Оқу орталығы кәсіподақ ұйымының төрайымы Гүлжан Ақназарованың ұйымдастыруымен өткен дәрісте тыңдаушылар тараздық әріптестерімен тәжірибе алмасып, депо жұмысымен танысты.
Орталықта тыңдаушыларға теориялық білім берумен қатар, практикалық дағдыларын жетілдіруге тәжірибе алаңдары мен лабораториясын қатар ұсынуға мүмкіндік мол. Әйтсе де, өндірістегі жұмыс барысымен танысудың жөні бөлек.
– «Жұмысшы мамандықтар жылына» орай арнайы ұйымдастырылған экскурсиялық сабақты «Қамқор» локомотив депосы сапаны бақылау бөлімінің бастығы Нұрболат Нұрсейітов пен Еңбек қауіпсіздігі және еңбекті қорғау жөніндегі жетекші инженері Ирина Куцева жүргізді. Машинист-инструкторлар тобының кураторы Әбдікәрім Бейсембаев локомотивтерді жөндеу процесінде қай цехта қандай жұмыстар жүргізілетінін түсіндіріп отырды, – дейді Гүлжан Ақназарова.
Оқу орталығының оқытушы-кураторына деподағы жұмыс барысы жақсы таныс. Әбдікәрім Түзелбайұлы біраз жыл машинист болып еңбек етіп, кейін 17 жыл «Қамқор» локомотив депосында қабылдаушы қызметін атқарған.
– Қабылдаушы болып жұмыс істеген кезімде жөндеуден өткен локомотивтердің әр деталін жіті қарап, тексеріп барып жолға шығаратынбыз. Сондықтан деподағы жұмыс процесін жақсы білемін. Мұндағы әріптестеріммен байланысымыз үзілген жоқ, – дейді Әбдікәрім Бейсембаев.
Экскурсиялық сабақ бір сағаттан аса уақытқа созылды. Уақыт түске таяп қалғанына қарамастан, жөндеу цехтарындағы процес бір сәтке де баяулаған жоқ. Әр маман, әр жұмысшы өз істерін жауапкершілікпен, тиянақты атқарып жатты. Уақытпен санаспайтын теміржолшылар түскі үзілісті де ұмытқандай. Басқа өңірлерден келген тыңдаушылар мамандармен тәжірибе алмасып, ой бөлісті.
