Құқықтық сауаттылық артуда
Абай облысы бойынша меншікті тілші
Семей ЖТ бөлімшесінде теміржолшылардың құқықтық сауаттылығын арттыру мен ұжымдары арасында еңбек құқықтарының сақталуы мен қорғалуы жолында ақпараттық-түсіндіру жұмыстары тұрақты жүргізіліп тұрады.
Жуырда бөлімшенің бас инженері Қанат Имашевтің төрағалығымен Абай өңірлік көлік прокуратурасы қызметкерлерімен кездесу өткізілді. Жиында еңбек заңнамасының талаптары түсіндіріліп, жалақыны уақытылы төлеу, желі бойындағы мекемелер бойынша жұмыс уақытының нормаларын сақтау, еңбек демалыстарын беру және еңбек орындарындағы қауіпсіздікті қамтамасыз ету мәселелері кеңінен талқыланды.
Абай өңірлік көлік прокуратурасының аға прокуроры Ерасылбек Сәкенбекұлы теміржол саласы бойынша жиі кездесетін мәселелерге тоқталып, кез келген күрмеулі мәселелерді шешуде көмек көрсетуге әрдайым әзір екендіктерін жеткізді. Сондай-ақ жиын барысында еңбек қауіпсіздігі, қызметкерлерді олардың келісімінсіз және тиісті ақысыз артық жұмысқа тартуға жол бермеу мәселелеріне де айрықша көңіл бөлінді. Осы орайда мекемелер мен депо басшылары, бас инженерлерінің де пікірлері тыңдалды. Мұнымен қоса қызметкерлер мен жұмыс берушілердің құқықтық мәдениетін арттырудың маңыздылығы да баса атап өтілді.
Іс-шарадан кейін кәсіпорын қызметкерлері көлік прокуратурасы өкілдерінің жеке қабылдауында болып, еңбек құқықтарына қатысты сауалдарына жауап ала алды.