Еңбекті қорғау күні: Маңғыстауда теміржолшы Нұрболат Жасановты еске алу турнирі өтті
Маңғыстау облысы бойынша меншікті тілші
Бүгін Дүниежүзілік еңбекті қорғау күні. Маңғыстаулық теміржолшылар жұмыс барысында аяқасты болған апат салдарынан өмірден өткен тепловоз машинисінің көмекшісі Нұрболат Жасановты еске алып, турнир ұйымдастырды.
Бір минуттық үнсіздікпен Нұрболаттың рухына құрмет көрсетуден басталған спорттық сайысты Маңғыстау локомотив депосының ұжымы жылда өткізеді. Әріптестерінің есімін ұлықтап, небәрі 24 жасында өмірден өткен теміржолшы туралы естелік айтып, еңбек ұжымына жаңа қосылып жатқан жастарға таныстырылады.
– Дүниежүзілік еңбекті қорғау күніне орай және өзінің қызметтік міндетін атқару барысында қаза тапқан тепловоз машинисінің көмекшісі Нұрболат Жасановты еске алуға арналған жарысты биыл да ойдағыдай өткіздік. Маңғыстау локомотив пайдалану депосының ұжымы және кәсіподақ комитеті оның есімін елеусіз қалдырған емес. Үнемі жүрегімізде. Осындай іс-шаралар арқылы өзгелерге де таныстырып, рухына құран бағыштап, қимастықпен еске аламыз.
Бұл жолғы жарысқа төрт команда қатысты. Жеңімпаздар кубок, диплом және ақшалай сыйлықтармен марапатталды. Дәстүрге айналған турнир жылдар өтсе де жалғаса береді, – дейді Маңғыстау локомотив депосының кәсіподақ комитеті төрағасы Әбілсейіт Нәбиханов.
Нұрболат Жасанов Маңғыстау локомотив депосында 2011 жылы машинист көмекшісі болып жұмысын бастаған. 2013 жылы Сайөтес – Маңғыстау учаскесінің Тамақ пикетінде, күзетпесіз теміржол өткелінде жүк пойызына мұнай тиелген автокөліктің соқтығысуы салдарынан болған алапат өрттен оқиға орнында қаза тапқан. Алматыдағы қазақ көлік және коммуникациялар академиясын бітіріп, жолдамамен түбек теміржолына келген ол небәрі 24 жасында осылай өмірден өткен еді.