Ардагерлер кеңесі өтті
Маңғыстау облысы бойынша меншікті тілші
Маңғыстауда түбек теміржолы ардагерлер кеңесінің кезекті отырысы өтті. Онда кеңестің жұмысы жайында айтылып, түбек теміржолының кешегісі мен бүгіні сөз болды.
Кеңес жұмысына теміржол мекемелері басшылары, кәсіподақ ұйымы өкілдері қатысты. Аймақтық ардагерлер кеңесінің төрағасы Үсен Имашев кеңес тарапынан іске асырылып жатқан игі шараларды атап, кейбір қолбайлау тұстарды бірлесіп шешуге шақырды. Мекеме басшылары болса, ардагерлер жұмысына қолдау білдіріп, бірлесе жұмысты жандандыратындарын айтты. Маңғыстау магистральдық желі бөлімшесі директоры Ерназар Ізтұрғанов ардагер теміржолшылардың түбек теміржолының өркендеуі жолында сіңірген еңбегі ұмытылмайтынын айтты. Ол мерейтойлық жасқа жеткен зейнеткерлерді құттықтап, 70, 80 жасқа толған ардагерлерді Алғыс хатпен марапаттады.
Марапатталғандардың қай-қайсысы да кезінде бар күш-жігерін осы салаға сарқи жүріп, өмірін темір жолмен байланыстырған жандар. Соның бірі – Маңғыстау түбегіне Мақаттан және Маңғыстау бағытынан тартылған қос жолдың қосылған кездегі тірі куәгері Ази Байпақов. Жол шаруашылығында еңбек еткен ол бүгінде сексеннің сеңгіріне шыққан Құрметті теміржолшы, Бейнеу ауданының Құрметті азаматы. Ази ақсақал өткен күндерді еске алып, қазіргі жетістіктерге қуанып отыратынын жеткізді. Ал кеңес төрағасы Үсен Имашев, Ұжымдық шартқа сәйкес жетпіс, сексен, тоқсан жасқа келген ардагерлерге атаулы көмектің берілуін қадағалап, тыл ардагерлерінің жағдайынан да хабар алып отыратынын жеткізді.