Тереңөзек станциясында «Қауіпсіз өткел» акциясы өтті

Биылғы «Заң мен тәртіп» тұжырымдамасы аясындағы кезекті республикалық «Қауіпсіз өткел» профилактикалық акциясын Қызылорда жол дистанциясының теміржолшылары Тереңөзек станциясы маңындағы өткелде өткізді. 

Тереңөзек станциясы аумағындағы 2770 шақырымда орналасқанөткелден сағатына 50 шақты автокөлік өтеді. Тереңөзек аудан орталығы болғандықтан орталыққа қатынайтын аудан көлеміндегі автокөліктер, ауыл шаруашылығы өнімдерін тасымалдаған жүк тасыған ауыр машиналардың бәрі  осы өткелден өтеді. Сондықтан мұндағы қозғалыс тәулік бойы бір тынбайды. 

– Қауіпсіздік акциясы бойынша бұған дейін де Бәйгеқұм, Бесарық, Шорнақ станцияларының  теміржол өткелдерінде рейд өтіп,  автожүргізушілерге теміржолдың қауіп-қатерлі аймақ екені, соған байланысты өткелден өту кезінде қауіпсіздік талаптарының қатаң сақтау қажеттігі түсіндірілді. Өткелден өту қағидаларымен танысқаны жайлы арнайы жорналға тіркелді. Бір сағат ішінде өткелден өткен автокөлік иелері мен тұрғындарға жол қозғалысы қағидаларын бұзған жағдайда заң алдында жауапқа тартылатыны ескеріліп, жадынамалар, ақпараттық үзінділер таратылды. Ал бүгін міне,, Тереңөзекте жалғасып жатыр, – деді Қызылорда жол дистанциясының бас инженері Ахметқали Елеусінов.

Сонымен қатар бұған дейін Қазалы жол дистанциясының теміржолшылары Қазалы станциясындағы өткелде, Қамбаш-Шөміш станциялары арасындағы телімнің 2445 және 2593 шақырымдағы Төретам – Ақжар бекеттері маңындағы теміржол өткелдерінде аталған акцияны жалғастырып, рейд өткізген болатын. 

– Қазалы жол дистанциясының теміржолшылары арнайы мамандармен бірге 26 тамызда Қамбаш (Қамыстыбас) станциясында, Төретам станциясында 27 тамызда және Жосалы станциясында 28 тамыз күні рейд өткізді. Жүргізушілерге теміржол өткелінен өту кезіндегі сақтық талаптары, ал тұрғындарға белгіленген орындардан өту керек екендігі түсіндірілді. Аталған станциялардағы теміржол өткелдері тұрғындар тығыз қоныстанған, негізінен аудан орталықтарында орналасқан. Сондықтан бұл өткелдерден тәулік бойы автокөліктер қозғалысы үзілмейді. Жалпы пойыз бен көлік қозғалысы қиылысатын теміржол өткелі аса қауіпті аймақ саналады. Тұрғындарды қауіпті аймақта қауіпсіздік талаптарына аса мән беріп, сақ болуға шақырамыз. Әрбір автокөлік иесі өткелден өтер кезде өткел кезекшісінің әрекетіне бағынуы тиіс, – дейді Қазалы жол дистанцисының бас инженері Сырлан Сұлтамұратов.

Жалпы,  республика көлемінде өткізіліп жатқан «Қауіпсіз өткел» акциясы бөлімшенің оңтүстігіндегі Бәйгеқұм теміржол өткелінде басталып, аймақтың солтүстігіндегі Сексеуіл, Арал теңізі станциялары маңындағы өткелдерде өтті, сосын қайтадан оңтүстік телімдерге ойысып, Шорнақ станциясында жалғасып, бүгін міне  Тереңөзек станциясында мәреге жетіп, бүкіл аймақты қамтыды.