Түйіспелі кеңесте талқыланды

Жуырда Семей ЖТ бөлімшесінде «ҚТЖ-Жүк тасымалы» АҚ орталық аппараты өкілдерінің қатысуымен түйіспелі кеңес болып өтті. Аталмыш басқосуға сондай-ақ, Павлодар, Шығыс Қазақстан және Илецк ЖТ бөлімшелері мен «Досжан теміржолы» АҚ басшылары да келген болатын.

Жиында кіріспе сөз алған Семей ЖТ бөлімшесінің басшысы Марлен Көкірекбаев Семей теміржолына техникалық мінездеме беріп өтіп, қазіргі таңдағы салалық қызметіне шолу жасап өтті. Осыдан соң кезек пойыз қозғалысын қамтамасыз ету мен жүк айналымын арттыру бойынша бөлімшеаралық мәселелер жайын талқылауға берілді. Бұл ретте іргелес павлодарлық көршілердің семейлік әріптестеріне айтар уәжі бар екен.

Атап айтсақ, Павлодарда жасақталған ұзын жылжымалы құрамдарды Семей және Жаңа-Семей станцияларымен өткізу бойынша бірқатар мәселелер бірлесіп талқыланды. Нормативтік кесте бойынша бекітілген бұл қозғалыстың жиілігі мен вагон қараушыларының тексеруінен өтуі бойынша біршама проблемалар бар екендігі анықталды. Сонымен қатар, ағымдағы жылы қос бөлімше аралығындағы ДегелеңАқсу телімі бойындағы Дегелең-Май қумажолына күрделі жөндеу жүргізу бойынша атқарылуы тиіс жұмыстар реті талқыланды. Осынау орайда аталмыш телім бойына шығатын локо мотив бригадаларының санын қайта қарастыру ұсынылды.

Бірлесіп шешуді қажет ететін осы тәріздес мәселелер Шығыс Қазақстан ЖТ бөлімшесі басшыларымен де талқыланды. Бұл ретте бірінші кезекте түйіспелі Шар станциясындағы пойыздарды дер кезінде алып кетпеу мәселесі қарастырылды. Соның себебінен жыл басынан бергі 4 ай ішінде 326 жүк пойызы жолдан кідірген. Сондай-ақ, түйіспелі кеңес барысында Ертіс үстінен өтетін теміржол көпірі бойынша жылдамдық пен салмақ мөлшерінің шектелуіне орай пойыздарды жасақтаудағы жаңашылдықтар да сарапталды. Сол тәрізді локомотив паркін қысқартып, тасымал үдерісінің тиімділігін арттыру үшін бірлесіп атқарылуы тиіс шаралар реті қарастырылды. Бұл мәселенің әсіресе көмір тасымалы күшіне енер шақта Дегелеңге апаратын барлық бағыттар үшін маңыздылығы арта түсетіні белгілі.

Мұнымен қоса, Алматы ЖТ бөлімшесі бойынша да пойыздарды қабылдап алу, тапсыру мәселесі төңірегінде бірқатар тұшымды келіссөздер өрбіді. Соның ішінде әсіресе ҚХР-дан бағыт алған пойыздарды кідіртпеу жөнінде атқарылуы тиіс шаралар қатары ортақ әңгіме ауанына айналды. Мұның сыртында күнгейдегі бөлімшемен шектесетін Жүзағаш станциясындағы «тастанды» пойыздар жайы да сөз болды.

Басқосу соңында түйіспелі кеңестің ортақ қорытындысы жасалынып, шешім шығарылды. Оның аясында бірлесіп атқарылар шаралар легі анықталды. Атап айтсақ, «берік тармақ» бойынша пойыздар алмасуды ширату, ауыр салмақты жүк құрамдары локомотивтерін кедергісіз өткізу сынды бірқатар түйіткілді мәселелер жөнінде әріптестік тоқтам жасалынды.