Қызметкерлер біліктілігіне сын

Семей ЖТ бөлімшесінде «Станцияның сапалы техникалық өкім беру актісі – қауіпсіздікті қамтамасыз ету кепілі» атты тақырыбымен үшайлық өтіп жатыр. Шараны ұйымдастырудағы мақсат – техникалық өкім беру актісін дұрыс құру арқылы қозғалыс саласындағы ақаулықтарға жол бермеу, қауіпсіздікке нұқсан келтіретін барлық жайттың алдын алу.

Үшайлық «ҚТЖ-Жүк тасымалы» АҚ бас инженері И.Костыряның №4208-И телеграфтық нұсқауына сәйкес қолға алынған болатын. Алдағы тамыз айының 15-не дейін өткізілетін акция барысын тиісті нормативтік құжаттамаларға сай өткізу мақсатында бөлімшенің бас инженері Самат Төлеповтің жетекшілігімен арнайы комиссия алқасы құрылып, жұмыс жүргізіп жатыр. Мысалы, үшайлық аясында өткізілуі тиіс жұмыс жоспары жасалып, белгіленген кесте бойынша іс-шаралар легі ұйымдастырылуда. Оның ішінде станция басшыларының және де олардың орынбасарлары мен техникалық өкім беру бойынша инженерлердің кәсіби білімдерін тексеруде де межелі шаралар қолға алынды. Ол үшін бөлімше басшыларының бекітуімен арнайы кесте әзірленіп бекітілген болатын. Соның аясында станциялар бойынша қозғалыс саласындағы орын алған ақаулықтардың салдары мен себептерін тереңінен талқылайтын жиындар мен тексерулер өткізілуде. Мәселен, белгіленген жұмыс кестесі бойын ша жуырда Шар, Шөптіқақ, Суықбұлақ станциялары бойынша үшайлық аясындағы атқарылып жатқан шараларды пысықтайтын тексерістер орын алды. Ал, осы аптаның дүйсенбісінен бастап Жарма мен Үшбиік станциялары қадағалауға алынатын болады. Сондай-ақ Дегелең – Жаңа-Семей телімі бойынша тексеру жұмыстары осы айдың соңы мен алдағы тамыз айының басына жоспарланған.

Жуырда Семей ЖТ бөлімшесінің өндірістіктехникалық бөлімінің басшысы Гүлнар Сейілханқызының жетекшілігімен арнайы басқосу болып өтті. Жиын барысында бөлім қызметкерлері аталмыш үшайлық аясында атқарылып жатқан шаралар легін пысықтап, жұмыстар барысын жүйеледі. Соның ішінде станция қызметкерлеріне жасалған ескертпелердің жойылуын қадағалауға алу мәселесі кеңінен сөз болды.

– Үшайлық шара бірінші кезекте станция басшылары мен қызметкерлерінің кәсіби тұрғыдағы біліктіліктерін сынға салуда. Желі бойындағы жолайрықтары мен станцияларда үшайлыққа байланысты атқарылып жатқан жұмыстардың барлығы – хаттама, бұйрық, ісшаралар жоспары, түсініктемелер, қызметтік хаттар түріндегі құжаттар біздің тарапымыздан арнайы тіркеуге алынуда. Сондай-ақ, үшайлықты нұсқаулыққа сай жүргізу бағытында біздің бөлім тарапынан арнайы жоспар әзірленген болатын, – дейді Семей ЖТ бөлімшесінің өндірістік-техникалық бөлімінің бастығы Гүлнар Сейілханқызы.

Мәжіліс барысында айтылып өткендей, алдағы отырыста станция басшыларының өткізілген үшайлық жайындағы есебі тыңдалатын болады. Жалпы, шара бөлімше басшысы Марлен Көкрекбаевтың тікелей назарында тұр.