Электр қуатына үнем

Семей магистральдық желі бөлімшесіне қарасты Семей электрмен қамту дистанциясы бойынша рационализаторлық ұсыныстар қатары жыл өткен сайын артып келеді.

Өндіріс барысындағы тиімділікті арттыру, соның ішінде электр қуатын үнемді жұмсау мен жұмыс орнындағы қауіпсіздік шараларын қалыптастыруды мақсат еткен дистанция өнертапқыштарының тың идеялары жоғары бағаланып, экономикалық тиімділікті де еселеуде. Өндіріске жаңашылдық енгізуде электромонтерлардың тәжірибеден өткен ұсыныстары Семей теміржолы бойынша елеулі үлес алады. Олардың рационализаторлық ұсыныс бойынша жоспарлы 5 жобасы толық орындалып, өнертапқыштардың бұл бес жаңалығы бүгінгі күндері өндіріске енгізілген. Мәселен, трансформаторлардағы май көлемін тексеретін майөлшегіш әйнекті ауыстырудағы тың тәсіл қазіргі күні бөлімше бойынша қолданысқа енгізілген десек, қателеспейміз. Сол тәрізді дөңестегі ЭЦ постыларының электрмен қамту сұлбасын өзгерту бойынша тиімділігі зор жаңашылдықтың да еңбек өнімділігін арттыратыны бүгінгі таңда іс жүзінде толық дәлелденді. Мұнымен қатар, өндіріс барысында БПЗ-401 заряды мен қоректендіру блогын пайдаланудың соны тәсілдерін ойлап тапқан мамандар да бар. Тоқтала кетсек, бұл жаңалықтардың ішіндегі экономикалық тиімділік ең кемі 20 мың теңгені құрайды.

Осынау жаңашылдықтардың авторлары негізінен Жаңа-Семей, Шар, Аягөз аудандық электр станцияларының электромонтерлары мен ұзақ жылдық еңбек өтілдері бар басшылар екен. 8 адамнан тұратын техникалық кеңестің қарауынан өтіп мақұлданған 7 өнертапқыштық ұсынысқа өткен жылы 84 175 теңгенің сыйақысы төленіпті.

Білікті басшы Нұрлан Әзімханов жетекшілік ететін дистанция үшін әсіресе өткен жыл мейлінше жемісті болыпты. Себебі, дистанцияға қарасты Аягөз, Шар, Семей, Защита, Серебрянск АЭС-тері бойынша рационализациялық шаралар бір-бірден артық орындалған.

Қазіргі күні де рационализаторлық ұсыныстар бойынша бірқатар жұмыстар жүргізуде. Біліктілік разряды жоғары мамандар теміржол бойындағы трансформаторларды тазалау, изоляторлар мен желілерді ауыстыру бойынша өз жаңашылдықтарын тәжірибеден өткізіп жатыр. Мәселен, дистанциядағы жоғары вольтты желілермен жұмыс істеуге арнайы рұқсатнамасы бар санаулы мамандар қыстың күндері физикалық заңдылыққа сай қатты аяз салдарынан тартылған сымдармен жұмыс істеудің тиімділігін ұзақ жылдардан бері сарапқа салып келе жатыр. Осы орайда Семей аудандық электр станциясының директоры, Құрметті теміржолшы Серік Дәулетбаевтың өнегелі кеңесін басшылыққа алған аға механиктер көп ұзамай тың жаңалық ашамыз деген үмітте.