Қауіпсіздікке келер нұқсан жоқ

Семей ЖТ бөлімшесі бойынша қыркүйектің 23 күні басталған кезекті күзгі комиссиялық бақылау жұмыстары өткен жұма күні аяқталды. Әуелгі кезекте Жүзағаш-Аягөз телімі, сондай-ақ Жарма-Шар-Жаңасемей телімдері сүзгіден өткізілсе, шалғай станциялар бойынша Дегелең-Жалпақ және Локоть-№41 жолайрығы бойында тексеру жұмыстары толықтай жүргізілді.

Шалғайдағы станцияларға қызметтік вагондармен жеткен комиссия мүшелері әр минутты босқа өткізбей, теміржол нысандары мен ғимараттарын, жергілікті сала қызметкерлерінің жұмыс ырғағын тексеріп шықты. Атап айтсақ, байланыс және жол шаруашылығы ревизорлары станцияның атшаптырым аумақты алып жатқан екі шетіндегі горловиналардан бастап мұқият тексеріп шықты.

Бірінші кезекте пысықталған шаралар қатарында рельс іргесіндегі электр жетектерінің қызметін және қысқа даярлығы болды. Сонымен қатар комиссия мүшелері ШЧ-30 және ШЧ-29 теміржолшыларынан сұрақ-жауап түрінде емтихан алып, кәсіби біліктіліктерін де сарапқа салды. Пойыз диспетчері мен жол диспетчерінің жол өткелдерімен байланысы да сынға алынды. Ал, жол шаруашылығы мамандары әдеттегіше рельс ауқымын өлшеп шығып, болттар мен бекітпелерге де тиянақты назар аударды. Осы орайда, жолшылар қауымы жаз бойғы атқарылған ауқымды шаралардың көп екендігін айтады. Әсіресе, Аягөз жол дистанциясына қарасты АягөзЖарма телімі аралығында күрделі жөндеу жүргізілген. Ревизорлар жаңадан салынған жол төсемін де қарап шықты. Қазіргі күні ағымдық және орташа жөндеу жұмыстары ауа райының қолайлылығына байланысты әлі де жүргізіліп жатыр. – Күзгі комиссиялық тексеру бары сында анықталған кемшіліктер саны анағұрлым аз. Себебі, осының алдында ғана Бас ревизорлық құрамның қатысуымен арнайы тексеру жүріп өткен болатын. Дегенмен, орын алған кінәраттарға байланысты ескерту бердік. Белгілі күндер ішінде толықтай жойылуы тиіс, – дейді Сайлау Юсупов бастаған Семей ЖТ бөлімшесінің шаруашылық ревизорлары. Желі бойындағы жолшылар жұмысын пысықтау барысында жауапты мамандармен бірге бөлімше басшылары да болып, теміржолшылармен, оның ішінде бригадирлермен және жол шеберлерімен жүзбе-жүз әңгіме өткізді. Сол тәрізді күзгі сын барысында станция қызметкерлері жетік білуі міндетті саналатын нормативтік құжаттамалармен жұмыс та басты назарға алынды. Бұл ретте ревизорлармен бірге бөлімшенің өндірістік-техникалық бөлімінің мамандары станциялар басшыларының қызметтік журналды толтыру, жоспарлы шараларды орындау барысындағы жұмыстарын кеңінен пысықтады. Күзгі тексеруде локомотив шаруашылығы бойынша ТЧЭ-25 пен ТЧЭ-24 және Дегелең станциясындағы ТД-18, Шардағы ТД-17 мекемелері де толықтай тексеруден өтті. Тепловоздардың алдағы қысқа әзірлігі мен станциялар басындағы маневрлік қозғалыс барысы сынға түсті. Комиссия мүшелері қатарында еңбекті қорғау инженерлері, қозғалыс қауіпсіздігіне жауапты басшылар мен өрт қауіпсіздігіне жауапты мамандар да қызу тексеру жүргізді. Бұл ретте анықталған жайттар – барлық теміржол нысандары алдағы қысқа толықтай даяр. Көпшілік мекемелер қатты отын қорын уақытында түсіріп, жылу маусымын бастап та жіберген. Қатардағы теміржолшылар тарапынан да өтініштер мен арыз-шағым түспепті. Күзгі сын Семей және ЖаңаСемей станцияларында мәреге жетіп, өткен жұма күні толық аяқталды. Жалпы, күзгі комиссиялық бақылау жұмыстарының қорытындысы мен нәтижелері таяу күндері бөлімшеде өтетін тораптық жиын барысында ортақ талқыға түседі деп жоспарланып отыр.