Қазығұртта қозғалыс тоқтаған жоқ
Шымкент қаласы бойынша меншікті тілшісі
Шымкент жүк тасымалы бөлімшесінің іргелі станциясы Қазығұртта жұмыс қарқыны кеміген жоқ, қозғалыс та бұрынғыдай қауырт жүріп жатыр. Станцияда 23 сәуірде басталған көктемгі байқау аяқталып, жүз пайыз дайындықтарын көрсетті.
Қазығұрт станциясының бастығы Тоқтасын Қалмырзаев көктемгі байқаудың биылғы жылы өз күштерімен өткізілуі еш кедергі келтірген жоқ, керісінше, асықпай әр мекемеге бірнеше күн арнап, мұқият тексеріліп, анықталған кем-кетікті жойып отыруға уақыт жеткен.
Барлық ғимараттар мен өндірістік алаңдар тазартылып, әктеліп, сырлау жұмыстары жүргізілді.
Станция жолдары арамшөптерден тазартылған. Жалпы, негізінен, Шымкенттегі мұнай өндеу зауытына қызмет көрсететін Қазығұрт пен Текесу – бөлімше үшін ең маңызды станциялар. Бір ғана Қазығұрт станциясында 28 жол бар.
Оның 1-14 жолдары қабылдау-жөнелтуге арналған, 15-28 жолдарда сұрыптау-жөнелту жұмыстары жүргізіледі, ал 27-ші жол қауіпті жүктерді қоюға арналған. Қалыптасып отырған жағдайға қарамастан станцияның көрсеткіштері де жаман емес.
Вагон айналымы сәуір айында 903 вагонды құраған. Ал 4 айда орта тәулікпен 980 вагонға жеткен. Тәулігіне 19 пойыз қабылдап, 16 пойыз жөнелтілген.
«Қазіргі таңда дүниежүзі бойынша жүріп жатқан COVID-19 індеті бойынша барлық посттарға дезинфекция жасайтын заттар жеткілікті түрде берілген. Жұмысшылар күнделікті жұмысқа түсер алдында медициналық тексеруден өтеді. Яғни арнайы дене қызуын өлшейтін құралмен тексеріледі. Жүргізіліп жатқан барлық іс-шаралар жұмысшылардың денсаулығы үшін жасалынып жатыр», – дейді станция бастығы. Айтуынша, өндірістік станция болған соң және көктемгі егіс, дала жұмыстарының басталуына орай мұнай және мұнай өнімдерін жөнелту бір күн де тоқтамаған. Станция бастығының шұғыл істер жөніндегі орынбасары Құнанбай Жаңабаев, станция бастығының логистика жөніндегі орынбасары Нұрәди Нұрлыбай, станцияның еңбекті қорғау және қауіпсіздік техникасы жөніндегі жетекші инженертехнологы Жұмабек Ахимов сынды өз істерінің майталман мамандары аз құраммен-ақ ауқымды жұмысты ұйымдастырып жүргізіп келеді. Жұмысшылардың барлығы маска, қолғап, дезинфекциялық құралдардан бөлек, арнайы жұмыс киімімен қамтылған. Бүгінгі таңға дейін станцияда еңбек қауіпсіздігі толық сақталған.