Арыс вокзалы: кеше және бүгін
Шымкент қаласы бойынша меншікті тілшісі
Былтыр 24 маусым күні Арыс қаласында таңғы сағат 9.20 шамасында №44859 әскери бөлімінде оқ-дәрі салдарынан жарылыс орын алып, бүкіл елді дүрліктіргенін қазақстандықтар ұмыта қойған жоқ.
Соңғы жарылыс 25.06.2019 жылы сағат 12.50 тіркелді. Жарылыстың салдарынан Арыс қаласында тұрғын үйлер, ірі маңызды стратегиялық орындар, мемлекеттік ғимараттар, әлеуметтік және бизнес нысандарының есік-терезелері сынып, қирап қалған болатын. Кейбір үйлерге, ғимараттарға снарядтар түсіп, түгі қалмай жанып кеткендері де болды.
Соның ішінде Арыс қаласының ең маңызды, стратегиялық нысандары Арыс-1 және Арыс-2 вокзалдары да қатты зақымданған болатын. Арыс вокзалының басшысы Жасұлан Садықов қазіргі таңда вокзалдар жөндеу жұмыстарынан кейін қайта қалпына келіп, жұмысын жалғастырып жатқанын жеткізді.
«Былтыр Төтенше жағдайға сәйкес, арнайы комиссия құрылып, комиссия мүшелерінің шешімімен Арыс-1 вокзалына күрделі жөндеу жұмыстары жүргізілді. Жөндеу жұмыстары «Самұрық-Қазына» Ұлттық әл-ауқат қоры» басшылығымен шілде айында басталып, 4 ай ішінде аяқтап, пайдалануға берілді. Ғасырдан асатын тарихы бар маңызды нысандар өздерінің архитектуралық үлгісін сақтай отырып жөнделді, бүгінгі таңда Арыс-1, Арыс-2 вокзалдары да карантиннен соң қайта ашылып жұмысқа кірісті», – деді вокзал басшысы Жасұлан Садықов.
Коронавирус індетіне қатысты теміржол байланысы тоқтап қалған болатын. Қазір қайта іске қосылған вокзалда карантинге қатысты барлық шаралар, тазалық сақтау ережелері, маскалық режим қатаң сақталған. Вокзалда 36 адам халыққа қызмет көрсетеді, оның ішінде Арыс-1 вокзалында - 24, Арыс-2 вокзалында 11 адам жұмыс істейді. Арыс-1 вокзалынан тәулігіне 6 жұп, яғни 12 пойыз қатынаса, Арыс-2 вокзалында 4 жұп, яғни 8 жолаушылар пойызы қатынауда.