Семей магистральдық желі бөлімшесі бойынша күрделі жөндеу жүргізуліде
Абай облысы бойынша меншікті тілші
Семей магистральдық желі бөлімшесі бойынша биыл күрделі жөндеу жүргізу жоспары қомақты. Оның басым бөлігі, яғни 26,8 шақырымы Аягөз жол дистанциясына тиесілі болса, қалғаны Семей дистанциясының еншісінде екен. Қазіргі таңда бөлімше бойынша маусымдық жұмыстарға бірінші кезекте баса көңіл бөлінген. Аягөз жол дистанциясында биылғы жылы межеге алынған жұмыстар қазір қызып тұр. Бұл орайда теміржолшылар ағымдағы жылға жоспарланған шараларды қарқынмен бастады. Басты міндет – жол сауықтыру, желі бойындағы бірқатар телімдерге күрделі жөндеу жүргізу. Қазіргі қолайлы ауа райы мен тыңғылықты даярлық, жол машиналары мен материалдардың уақытында жеткізілуі – құжат жүзіндегі есептелген сандардың нақты іспен көрініс табуына негіз болып тұр. Айта кетерлігі, Аягөздегі ПЧ-42 мекемесі үшін соңғы жылдардағы бір ерекшелік, Аягөз-Жарма телімі аралығындағы бірқатар қумажолдар бойынша күрделі жөндеу жүргізу болатын. Жаз басталысымен аталмыш участок бойына арнайы мамандар жіберіліп, жұмыс жасалатын аумақтар анықталып, белгіленген болатын. Осылайша, өзекті мәселеге тереңірек зерттеу жүргізіп, материалдық тұрғыдан қам жасалған соң ғана, жолшылар қауымы ауқымды шараға білек сыбана кіріскен. Бұл орайда қазіргі таңда Қарақойтас-16 жол айрығы және Үшбиік станциясы аралығында қауырт жұмыс жүргізіліп жатыр. Жалпы көлемі 26,8 шақырымдық желі бойын темір-бетонды шпалдарға ауыстыру ісі көзделген мерзім ішінде белгіленген кестеден кешіктірілместен толық күрделі жөндеуден өткізілуде. Айта кетерлігі, бұл жолдың барлығы жаңа теміржол бунақтарын төсеу арқылы жаңадан түйіспесіз жолдарға ауыстырылуда. Оның нәтижесінде жолдың балдық сапасы да жақсарып, телімдік жылдамдық жоғарыламақ. Қазіргі күні Аягөздегі ПЧ-42 мекемесіне жаңадан шпалдар жеткізілуде. Ағымдық жөндеу жұмыстары барлық станциялар бойынша іркіліссіз жүргізіліп жатыр. – Жол машиналарынан тапшылық жоқ. Бірқатар кешенді жол жөндеуші техникалар жұмылдырылуда. Жолшылар бригадаларынан тұратын қол күші де жеткілікті. Ауа райының мейлінше қолайлылығы әрі қажетті материалдар уақытында жеткізілгендіктен кешеуілдеу орын алған жоқ, – дейді бұл орайда Семей магистральдық желі бөлімшесінің жол бөлімінің бастығы Қайыргелді Ахметжанов. Қазіргі күндері Аягөздегі ПЧ-42 мекемесіне Ақтоғай-Аягөз-Жарма аралығындағы 225 шақырымдық бас жол кіреді. Аталмыш телім бойындағы жұмыстың өзіндік ауыртпашылығы бар. Атап айтсақ, 225 бас жолдың тек жүз шақырымнан біраз астамы ғана темірбетонды түйіспесіз жол. Қалған бөлігінде әлі күнге дейін ағаш шпалдар қолданылады. Сол себептен де жол күтімі аса жоғары деңгейде болуы керек. Осыны міндет тұтқан аягөздік жолшылар байырғы Түрксіб жолының қауіпсіздігін қамтамасыз ету, сапасын жақсарту мақсатында бұрынғы жылдармен салыстырғанда қарқынды жұмысқа көшкен. Биылғы жылы жоспарлы шаралардың көлемді болуы соған дәлел болса керек-ті. Осы орайда ПЧ-42 мекемесі бойынша 27208 текше метр қиыршық тасқа өтінім берілген болатын. Бұған қоса қазіргі күнге дейін 25116 темірбетонды шпал жеткізілді. Нәтижесінде телім бойында қарбалас та арта түскен. Бүгінге дейін аягөздік жолшылар 26 толаскез өткізіпті. Бұл бөлімше бойынша ең жоғары көрсеткіш болып отыр. – Жалпы, Аягөз жол дистанциясында 70 шақырымдық станциялық жолдар мен 219 бағыттамалы бұрмаларды да толық темірбетонға ауыстыру ісі кезең-кезеңмен жүргізілуде. Осыған дейін Ақтоғай-Аягөз телімі бойынша күрделі жөндеу жұмыстары жүргізілсе, ендігі аралықта Аягөз бен Жарма аралығын барлық талапқа сай етудеміз, – дейді аягөздік жолшылар.