Семей теміржолшыларының 52 пайызы екпе алды

Ел шығысындағы теміржолшылар қауымы коронавирус инфекциясына қарсы жаппай вакцинациялау науқанын қызу түрде өткізуде. Мақсаттары – қауіпті індетке қарсы ұжымдық иммунитет қалыптастыру. Маусымның 30 күнгі мәлімет бойынша, Семей магистральдық желі бөлімшесі қызметкерлерінің 52 пайызы екпе алды. Алғашқы болып НЖС-6 директоры Айдын Шәукежанов пен бөлім басшылары вакцина алған болатын. Алғашқыда сылбыр басталғанымен, қазіргі таңда ақпараттандыру жұмыстарының тиімді жүргізілуінің нәтижесінде бұл іс қарқын алуда. Екпе қабылдау бойынша әсіресе жол шаруашылығы теміржолшылары алда келеді. Мәселен, Семейдегі ПЧ-42 мекемесі қазіргі күннің өзінде 70 пайызға жуықтаса, Жаңа-Семей жол дистанциясы 62 пайызға жетіп отыр. Ал Защита өңірінің жолшылары 72 пайызбен көш бастап келеді.

– Күн сайын екпе алған әріптестердің санын арнайы тіркеп отырамыз. Соңғы апталарда екпе алушылар қатары күрт артты. Қазіргі күні 52 пайыз қызметкерлер вакцина алды. Өңіріміз бойынша 4 түрлі вакцина бар. Әйтсе де, ағзаға кері әсері байқалмауы себепті, әрі жеңіл өтетіндіктен теміржолшылар арасында ковид-19 вирусына қарсы отандық «qazvac» пен «hayatvax» екпелеріне сұраныс жоғары болып тұр. Егер дәл осы қарқынды жоғалтпасақ, алдағы қыркүйек айына дейін ұжымдық иммунитет қалыптастыруға толықтай қол жеткізетін боламыз. Себебі, қаламыздағы сауда орындары мен Семей, Аягөз сынды ірі қалаларда жылжымалы вакцинациялау пункттері ашылуда, – дейді бұл орайда пікір білдірген НЖС-6 бөлімшесінің кадр бөлімі басшысы Данияр Баймағұлов.

Қазіргі таңда шығыстағы теміржолшылар қауымы вакцинаның тиімділігі және алғашқы компонентін алғаннан кейінгі әсерлері жайында әлеуметтік желілерде жағымды пікірлер жариялап, өзге әріптестерін де шақыруда. Сәйкесінше, түсіністік танытушылар көп. Яғни, екпе алу науқаны ерікті түрде өтіп жатыр деген сөз.