Бадамнан Маңғыстауға 4 вагон шөп жіберілді
Шымкент қаласы бойынша меншікті тілшісі
Түркістан облысы, Ордабасы ауданы, Бадам станциясынан Маңғыстау облысына 5 мың бау, яғни 110 тонна шөп тиелген 4 вагон шөп жіберілді. Бұл игі іс-шара «Nur Otan» партиясы Түркістан облыстық филиалының үйлестіруімен, Ордабасы ауданы әкімдігінің ұйымдастыруымен өткізілді. Батыстағы қуаңшылық бүкіл елді алаңдатты. Оның ішінде Түркістан облысының тұрғындары да шама келгенше әрекет етіп, көмегін жолдап жатыр. Бұл ретте отаншыл жас Құрмет Талапқазының бастамасы қоғамға қозғау салғанын айта кеткен жөн. Түркістан облысының әкімі Өмірзақ Шөкеевтің атсалы- суымен «Қазақстан темір жолы» ұлттық компаниясы» акционерлік қоғамымен келісім жасалып, логистика мәселесі шешілгені белгілі.Ордабасы ауданының жанашыр азаматтары, белсенді тұрғындары ұсынған көмек Маңғыстау облысына жіберіліп отыр. Шөпті жинауға және артуға ауданның еріктілері, белсенді азаматтары, жасотан- дықтар және өзге де жанашыр жандар көмек көрсетті. 
Бадам станциясынан жолданған мал азығы Маңғыстау облысының Шетпе, Құрық және Жетібай станцияларына жеткізіледі. Ол жақта көмекті күтіп алып, үлестіретін азаматтар бекітілген.