Оңтүстіктен батысқа мың тонна шөп жөнелтілді
Шымкент қаласы бойынша меншікті тілшісі
Түркістан облысының тұрғындары мен еріктілері облыс әкімдігінің қолдауымен Маңғыстау облысының шаруаларына көмек көрсетуді жалғастыруда. Облыс әкімі Өмірзақ Шөкеев батыс өңірлерге жем-шөпті жөнелтудің тегін логистикасы мәселелерін бақылауда ұстап отыр. Бұған дейін «Қазақстан темір жолы» ұлттық компаниясы» АҚ қолдауымен Маңғыстау облысына 23 вагон шөп жөнелтілген болатын Бұдан бөлек, бүгін Сарыағаш қаласының теміржол станциясынан тағы 10 вагон мал азығы жөнелтілді. Қазіргі уақытта жергілікті еріктілер мен аграршылар Түркістан облысы әкімдігі мен ҚТЖ қолдауымен Маңғыстау және басқа да облыстарға қосымша 40 вагон жем-шөп жіберу жұмыстарын жүргізуде. Келісімдерге сәйкес мал азығын жеткізу жұмыстары тегін жүргізілуде. Сонымен қатар, облыс әкімдігі және «Қазақстан темір жолы» ұлттық компаниясы қажет болған жағдайда дайындалған жем-шөпті тасымалдау үшін 100 вагон ұсынуға дайын. Облыс басшысының тапсырмасына сәйкес, облыстың агроқұрылымдарына орман қоры жерінен жайылымдар мен шабындықтар берілді. Айта кетейік, ағымдағы жылы құрғақшылық тек батыс өңірлерде ғана емес, Түркістан облысында да орын алды. Келес және Сарыағаш аудандарының шаруалары да жылдағыдай емес, шөп аз деп отыр. Дегенмен, бүгінгі таңда өңірдегі жағдай тұрақты. Бірқатар аудандар қажетті жем-жөп мөлшерін толық жинап үлгерген.