Семейлік үздік теміржолшыларға сый-сияпат жасалды
Абай облысы бойынша меншікті тілші
Ел шығысындағы теміржолшылар үшін биылғы кәсіби мереке ерекше есте қалар жағдайлармен толыға түсті. Пойыз қозғалысындағы қауіпсіздік пен жүк тасымалындағы ерен еңбектері еленген бірқатар сала мамандары түрлі марапаттар иеленіп, құрметке кенелді, деп хабарлайды Rail-news.kz. Бөлімшенің мәжіліс залында өткен шағын мерекелік салтанатта бөлімше басшысы Сиязбек Әлішев отандық теміржол саласының бүгінгі жеткен биігі жайлы сөз қозғап, Тәуелсіздіктің 30 жылдық мерейтойы қарсаңындағы шығыстағы жетістіктерге де тоқталды. Сонымен қатар, осы орайда еселі еңбектерімен танылып жүрген бірқатар әріптестерін атап өтіп, биылғы жылы Семей ЖТ бөлімшесінің төрт бірдей қызметкері «Құрметті теміржолшы» атанғанын қуанышпен жеткізді. Олардың бәрі абырой мен құрметке лайық. Мәселен, алғашқы еңбек жолын қатардағы жолшыдан бастап Семей магистральдық желі бөлімшесінің басшысы деңгейіне дейін көтерілген Айдын Шәукежанов, вагон шаруашылығының білікті маманы, бөлімше бойынша кәсіподақ төрағасы Алик Досанов сынды әріптестері үшін барша теміржолшылар қол соғып, құрмет көрсетті. Сонымен қатар, тағы да бірқатар теміржолшылар бөлімше басшысының қолынан түрлі марапаттар алды. Мәселен, Болатқали Баймұханбетов «Кәсібі бойынша үздік» атанса, Бақытжан Шинжина «Үздік маман» атағын алды. Санитарлық-эпидемиологиялық талап-ережелер сақталып өткізілген жиыннан соң барлық теміржолшылар бөлімше ауласында естелік фотосуретке түсті.