Жыл басынан бері 1 адам мерт болса да арыстықтар темір жолды кесіп өтуін қояр емес

Жыл басынан бері бөгде адамдардың темір жол бойында жүруі салдарынан Арыс жол дистанциясында 5 рет шұғыл тежеу орын алып, бір кісі өлімі тіркелді. Жалпы, 2017 жылдан бері адам басу оқиғасы жеті рет тіркелген екен. Арыс жол дистанциясы Түркістан облысының бес ауданы арқылы өтетін темір жолды күнделікті күтіп ұстайды. Еліміздің оңтүстігі – халықтың тығыз орналасқан және жеке малды көп ұстайтын аймақ. Халқының негізгі күнкөрісі де осы теміржол мен қорадағы ірілі-ұсақ малы. Малды қысы-жазы қолда ұстау тиімсіз болғандықтан, көктем шығысымен өріске айдап қоя береді. Оңтүстіктің ауа райы жаз кезінде өте ыстық болғандықтан шөптер тез қурап кетеді. Сол кезде қараусыз жүрген төрт-түлік шөбі басылмаған теміржол мен автожол маңына қарай ойыса бастайды. Теміржолдағы қоршаулар әрі-бері өткен адамдардың салғырттығынан көбіне ашық қалады да қараусыз мал ішке еніп кетеді.

«Біз өз тарапымыздан тұрғындардан ары-бері өту- ге қалдырылған өтпелерді үнемі жауып жүрулерін сұраймыз әрі пойызға басылып жатқан мал да сол жергілікті тұрғындарға тиесілі болған соң жауапкершілікті талап етеміз. Сол малды бағып, төлін, сүтін, етін сатып күнкөріс жасап жүрген өздеріне малдан айырылып қалудың және пойызды тоқтатқаны немесе локомотивті зақымдағаны үшін төленетін айыппұлдың да өз қалталарына ауыр тиетінін үнемі ескертіп отырамыз. Ірі қара малдан бір айырылып, одан қала берсе темір жолға келген шығынды екі рет өтеп жатса, ол мал иесіне де оңай тимейді. Бірақ соны біле тұра ірі қара малды қараусыз қалдырып, өтпені ашық қалдырып кететіндерін түсіне алар емеспіз», – дейді Арыс дистанциясы бас инженерінің міндетін атқарушы Бақытжан Сарыпбеков.

Малдан бөлек, халық жиі қоныс тепкен елді мекендерде адамдардың пойыз астына түсіп қалу оқиғалары жиі орын алып жатады. Темір жолдан тек белгіленген жерлерден ғана өтуді қанша айтса да адамдардың құлақ аса бермейтіні өкінішті. Ал, мұндай салғырттықтың салдары адам өліміне әкеп соғатыны белгілі.