Атырауда бильярдтан турнир өтті
Атырау облысы бойынша меншікті тілші
Жуырда Атырау қаласындағы «Бомонд» бильярд клубында өлке теміржолшылары арасында бильярд ойнынан ҚТЖ ОК кәсіподақ төрағасы жүлдесіне арналған турнир өтті. Турнир салалық кәсіподақтың Атырау аймағы бойынша өкілдігі және спорт нұсқаушыларымен бірлесе ұйымдастырылып, оған Атырау жүк тасымалы және магистральды желі бөлімшелерінен бірнеше команда қатысты.
Жарысқа қатысқан ойыншылар бильярд үстеліндегі шар тасын көздеп атып, тесік торға топ еткізіп түсіруге барын салды. Қол жүріп кетсе, допша домалап, ал кейде қанша тырыссаң да ырыққа көнбей кететін бұл ойынның сондай өзіндік ерекшелігі де бар. Мүлт кетсең, бағың тайып, барыңнан айрыласың. Шарды шарға ұрып дөп тигізсең, ұпайың көбейеді. Сондықтан да ойыншылардың шеберлігі сыналған бұл күні қапы кеткен де, нысанаға дәл атқан да сәттер болды.
Ақырында, жүлделі 3-ші орынды НЖС-13 бөлімшесінің заңгері Бахтияр Боқаев, екінші орынды Атырау вагон пайдалану депосының вагон қараушысы Бекзат Мыңғалиев, ал бірінші орынды Мақат локомотив пайдалану депосының тепловоз машинисі Сәрсембіұлы Нұркен жеңіп алды. Жеңімпаздар грамоталармен және ақшалай сыйлықпен, ал барлық қатысушылар ынталандыру сыйлықтармен марапатталды.
Атырау жүк тасымалы кәсіподақ ұйымының спорт нұсқаушысы Ринат Иманғазиевтің айтуынша, өңірде өтекен турнирде, 1-ші орынды иеленген Н.Сәрсембіұлы бильярдтан Алматы қаласында өтетін финалдық жарыста Атырау өңірінің намысын қорғайды.
