Таразда теміржолшылар арасында бильярдтан турнир өтті
"Қазақстан теміржолшысы" газетінің Жамбыл облысындағы меншікті тілшісі
Теміржолшылар кәсіподағы Жамбыл филиалының ұйымдастыруымен Тараз қаласындағы «Имперья» клубында бильярдан турнир өтті, деп хабарлайды Rail-news.kz.
Теміржолшылар кәсіподағының 120 жылдығына орай өткізілген турнирге қатысушыларға сәттілік тілеген «Жамбыл магистральдық желі бөлімшесі» филиалының директоры Мейрамбек Кенжебаев, кәсіподақ филиалының төрағасы Ерболат Жидебаев спартакиада мен жарысты жиі ұйымдастырудың арқасында спортпен шұғылданушы теміржолшылардың саны артқанын атап өтті. Бильярд жарысының дәстүрі бойынша Мейрамбек Сермағанбетұлы «пирамиданы» жарып, тастаяқшылар жарысын бастап берді.
Турнирге «Жамбыл жүк тасымалы», «Жамбыл магистральдық желі бөлімшелері филиалдарына қарасты құрылымдардан жалпы сегіз жұп, он алты теміржолшы қатысты. Қарсыластар жеребе бойынша анықталып, бірінші айналымда әр жұп негізгі екі ойын қорытындысымен лузаға ең көп шар түсірген тастаяқшылар жартылай финалға шықты.
Төрт жұп ойыншының мықтылары финалда турнирдің бәсін қыздырды. Нәтижесінде ЭЧ – 21 Жамбыл электрмен жабдықтау дистанциясының электромеханигі Темірхан Оралұлы жеңімпаз атанса, қарсыласына есе жіберген ПЧ – 52 жол дистанциясының есеп бөлімінің бастығы Қайсар Телеуов 2-орынды қанағат тұтты. Тараз станциясының маманы Нұрболат Сейілбек үздік үштікті түйіндеді.
Жеңімпаздар мен үздік ойыншылар кәсіподақ филиалының Алғыс хаттарымен марапатталды. Медальдар мен кубоктар, қаржылай сыйлықтар тапсырылды.