Тораптық жарыста топ жарды
"Қазақстан теміржолшысы" газетінің Жамбыл облысындағы меншікті тілшісі
«Қазтеміржолкәсіп» ҚБ Жамбыл филиалының спорт нұсқаушыларының ұйымдастыруымен Тараз станциясында ерлер арасында шахмат пен дартс атудан тораптық жарыс өтті.
Тәуелсіздік күні және теміржолшылар кәсіподағының 120 жылдығына арналған турнирге Жамбыл жол бөлімшесіне қарасты құрылымдардың қызметкерлерімен қатар ардагер теміржолшылар да қатысты.
– Шахматшыларға шапшаң ойлау, жылдам саралай білу және шыдамдылық керек. Теміржолшылардың бойында осы қасиеттер қалыптасқан. Соңғы жылдарда сала қызметкерлері арасында мықты ойыншылар көптеп танылып келеді. Бұрын ешкім ардагерлерден басым түсе алмаса, кейінгі кездері жаңа шеберлер пайда бола бастады. Әйтсе де, кешегі шахмат турнирінде тағы да аға буын жеңіске жетті. ВЧД-27 Жамбыл вагон пайдалану депосында ұзақ жыл еңбек етіп, зейнетке шыққан Андрей Швалев 1-орынды олжала ды. Ал 2-орынды ЭЧ-21 дистанциясының оқыту шебері Марат Құлбаев еншілесе, ЭЧ-23-тің аға энергодиспетчері Жарас Тұрарбек үздік үштікті тәмамдады, – деді «Қазтеміржолкәсіп» ҚБ Жамбыл филиалының спорт нұсқаушысы Евгений Тян.
Дартс ату жарысында ВП-35 қалпына келтіру пойызының бастығы Махат Байдалиев жеңімпаз атанды. Ардагер теміржолшы Андрей Швалев мергендер бәсекесінде де мықты екенін дәлелдеп, 2-орынды иеленсе, ШЧ-36 Жамбыл белгі беру және байланыс дистанциясының еңбекті қорғау инженері Ержан Ахметбеков 3-орынның жүлдесін олжалады. Кәсіподақ филиалы атынан жарыс жүлдегерлеріне сыйлықтар тапсырылып, ойыншылар грамоталармен, медальдармен марапатталды.