Шымкентте шағын футболдан турнир өтті
Шымкент қаласы бойынша меншікті тілшісі
Қазіргі кезде әлемдік пандемияға байланысты көптеген шараларды өткізу баяулап қалғаны рас. Дегенмен, шымкенттік теміржолшылар Ұлы Отан соғысы ардагерлерінің құрметіне мамыр айының ортасына белгіленген шағын футболдан турнир өткізді. Жарыс карантин шектеулерінің барлық ережелерін сақтай отырып жүргізілді. Ардагерін ардақтайтын ұрпақ барда ел қариялары жүз жасайды. Оларды тек мереке күндері ғана елеп-ескермей, барлық кезде құрмет тұтып, тағзым білдіру – бүгінгі ұрпақтың міндеті деп санайды Шымкент филиалы кәсіподақ ұйымының төрайымы, орталық кеңесінің мүшесі Нағима Салықбаева. Арыс қаласында өткен мини-футболға қатысушы командалар теңбіл допты сағынып қалғандарын көрсетті. Жарыс өте тартысты болып өтті. Сонымен қатар, олардың бойындағы спортқа деген құштарлық, жеңіске деген талпыныс, теміржолшылардың жүзіндегі достық көңіл-күй жарыстың көрігін қыздыра түсті. Сонымен, мини-футболдан өткен жарыста 1-орынды ШЧ-38, 2-орынды Сарыағаш станциясы, 3-орынды Арыс станциясы иеленді. Жарыс соңында Шымкент филиалы кәсіподақ ұйымының төрайымы, орталық кеңесінің мүшесі Нағима Әуезханқызы қатысушылар алдында сөз сөйлеп, оларға ардагерлер атынан алғыс білдіріп, лайықты сый-сияпаттарын табыс етіп, марапаттады.