Әйтеке би станциясының тыныс-тіршілігі
Ақтөбе облысы бойынша меншікті тілші
«Ғасыр құрылысы» атанған «Хромтау – Алтынсарин» магистралі бойында пайда болған Әйтеке би станциясына жолымыз түсті.
Қазақстан темір жолы компаниясының тасымал қызметіне «Әйтеке би станциясы» атауымен енген бекет – 2004 жылы пайдалануға берілген Хромтау – Алтынсарин теміржолының бойындағы 7 станцияның бірі. Елдің шығысын батыспен байланыстырып, орталық аймақтарды оңтүстікке жалғаған теміржол бұл өлкеге алғаш тартылған. Шойынжолдың салынуы жергілікті халықтың тұрмысы мен әл-ауқатының өсуіне үлкен әсер еткенін әйтекебиліктер жарыса айтады. Оған дейін жұмыссыздықпен күрескен ауыл тұрғындары жаппай теміржолшы кәсібін меңгеруді бастады. Бүгінде екінің бірі темір жол мекемелерінде жұмыс істеп, отбасын асырап отыр. Станция мен жолаушыларға қызмет көрсету мекемелері, тиісті темір жол инфрақұрылымдары жұмыс істеп тұр.
Станциядағы 5 жолдың бірінші, екінші жолында жолаушылар пойызы қабылданады. Әйтеке би вокзалында тек нәзік жандардан құралған шағын ұжым келген-кеткен жолаушыларға қызмет көрсетеді. Әйтеке би вокзалына жолаушы халық айналадағы елдімекендерден де келіп пойызға отырады. Теміржол қатынасы жоқ Ырғыз ауданы, Қарабұтақ ауылдарынан келетін жолаушылар көп. Теміржол қызметін тұтынушылардың дені Қостанай, Астана бағытына қатынайды. Астана, Қарағанды, Алматы бағытына шығатын жолаушылар да аз емес. «Алматы – Орал» тальго жүрдек пойызы да Әйтеке би вокзалынан күнде өтеді. Бұл пойыз да өлкедегі жолаушылар тасымалын дамытуға айтарлықтай ықпал етуде. Осындай жолаушы ағынына қызмет көрсетіп отырған вокзалдың ұйымшыл ұжымында өз кәсібіне ысылған жандар еңбек етеді.
«Жолаушылардың билеттерін реттеп, пойызға мініп-түсуін қадағалаймыз. Үлкен кісілерге электронды билет алуға көмектесіп, кері тапсыратындары болса қабылдап, қолдан келгенше қызметімізді көрсетеміз. Келген-кеткен пойыздар туралы үздіксіз ақпарат беріледі», – дейді аға вокзал кезекшісі Замард Айдаубаева.
Бізді «Әйтеке биге қош келдіңіз!» деп қарсы алған аға вокзал кезекшісінің қасында төрт вокзал кезекшісі бар. Вокзалдан төрт жұп пойыз өтеді. Олар – «Семей – Маңғыстау», «Атырау – Астана», «Алматы – Орал», «Астана – Орал» бағытындағы пойыздар.
Вокзалда билет алуды электронды түрде ұйымдастыру жолға қойылған. Сондықтан тиімсіздігін ескеріп, 2 жылдан бері билет кассаларын алып тастаған. Анықтама бұрышы жұмыс істеп тұр.