Болашақ станциясы он жылдығын атап өтті

Маңғыстаудың  Болашақ станциясы арқылы Қазақстан мен Түркіменстан арасындағы теміржол байланысына 10 жыл толып отыр. Көрші елмен теміржол қатынасының орнауы еліміздің транзиттік әлеуетін арттыруға орасан зор мүмкіндік беріп, бүгінде миллиондаған тонна жүк осы жолмен шетел асуда.  

Сонымен қатар жаңадан тартылған теміржол бойына ел қоныстанып, сахара кемесі түйелер жортқан елсіз далаға жан бітіп, тіршілік пайда болды. Сондықтан шекарадағы Болашақ станциясында өткен он жылдық мерейтойына жергілікті халық, оның ішінде теміржолшылар тайлы-таяғына дейін қатысты. Салтанат көк туды желбіретіп, ауыл көшелерімен жүріп өткен мотошеруден бастау алды.  Спорттық сайыстар, мерекелік жәрмеңке ұйымдастырылып, станцияның қалыптасып, өркендеуіне үлес қосқан жандар марапатталды.  

Маңғыстау қосалқы бөлімінің бастығы Нәжімеден Ғұбашов, Қарақия ауданының әкімі Қыдырберді Беков, Маңғыстау облысының Құрметті азаматы, Құрметті теміржолшы ардагер Қожахмет Уәзір, т.б. азаматтар көпшілікті айтулы датамен құттықтап, өткен жылдардан естеліктер айтылды.  

– Бұл маршрут арқылы жүк ағыны нарыққа ең қысқа құрлық жолымен өтеді. Әрі әлемдік саудаға даңғыл жол ашады. Яғни елдер арасында тікелей жеткізілім жасап, транзиттік тасымалдың уақытын айтарлықтай қысқартады. Болашақ станциясы осындай маңызды миссияны атқарып отыр, – деді өз сөзінде Маңғыстау қосалқы бөлімі бастығы Нәжімеден Ғұбашов.