Семей станциясы үздік атанды
Абай облысы бойынша меншікті тілші
Жуырда Семей станциясында бөлімше басшысы Алмас Сейсемқановтың төрағалығымен арнайы жиын өтті. Басқосу барысында бірқатар өзекті мәселелер сарапқа түсіп, кеңінен талқыланды.
Атап айтсақ, көктемгі комиссиялық бақылау қорытындысы, ұжымдық шарт аясындағы атқарылып жатқан іс-шаралар кеңінен сөз болды, кәсіподақ ұйымының өткен жылғы жұмыс қорытындысы бойынша есеп тыңдалды.
Бөлімше басшылығы теміржолшылармен қазіргі таңдағы жұмыс барысы туралы еркін пікір алмасып, қызметкерлердің көкейтесті мәселелерін тыңдады.
Станция қызметкерлері өзекті сауалдарын қойып тұщымды жауап та ала алды.
Бөлімше басшысы Алмас Ғылымұлы өз сөзінде Семей станциясының өткен көктемгі комиссиялық бақылау қорытындысы бойынша желі бойындағы барлық мекемелер арасында үздік атанғанын жеткізді.
Атап айтсақ, нормативтік-техникалық құжаттарды рәсімдеу, жылжымалы құрамдар мен құрылғыларға күтім жасау нормаларын сақтау, өткен бес айдың ішінде еңбек және қозғалыс қауіпсіздігі талаптарын орындауда, сондай-ақ жалпыреспубликалық «Таза Қазақстан» бағдарламасы аясында сенбілік жұмыстарын жүргізуде алдыңғы орыннан табылды.
Бөлімше директоры Алмас Ғылымұлы Семей станциясының басшысы Болат Өтегеновке ұжымға арналған Құрмет грамотасын салтанатты түрде табыс етті. Сонымен қатар, станция басындағы жеті қосынға және ас ішу бөлмесіне теміржолшылар игілігі үшін арнайы тұрмыстық жабдықтарды сыйға берді.
