Шиелі станциясы рекорд жаңартты

Қызылорда ЖТ бөлімшесінің оңтүстігінде орналасқан Шиелі станциясы – аймақтың өндірістік тынысын ұстап тұрған, өңірдегі кәсіпорындардың теміржол көлігіне деген сұранысын үздіксіз қанағаттандырып отырған маңызды нысан.  

Станцияның тынысы ешқашан саябырсыған емес. Тәуліктің қай мезгілі болмасын қозғалыс бір тынбайды. Әр ауысым өз міндетін мінсіз атқаруға тырысады.  

– Жыл басынан бергі көрсеткіштеріміз 102 мен 171 пайыз аралығында орындалып отыр. Мысалы, жұмыс паркінің 310 вагонға бекітілген жоспары бүгінде 181 вагонға дейін жеткізіліп, 171 пайыздық жоғары нәтиже көрсетті, – дейді станция бастығы Ғалымжан Ізбасханұлы.  

Айтуынша, транзитті жүк вагондарының құжаттарын рәсімдеу кезінде 11,07 сағатқа белгіленген бос тұру межесі 10,83 сағатқа дейін қысқартылған. Бұл көрсеткіш те бекітілген жоспардың 102 пайызға орындалғанын көрсетеді. Осындай нәтижелер – станциядағы маневрлік тепловоздың тиімді жұмысы мен пойыз қозғалысын үйлестіріп отырған тәжірибелі мамандардың ерен еңбегінің арқасы.

Шиеліліктердің тағы бір мақтанышы – осы уақытқа дейін пойыздық, маневрлік, қабылдап-жөнелту жұмыстары кезінде бірде-бір рет қозғалыс тәртібінің бұзылуына жол берілмеген.  

Мұнда әр қызметтің өз реті, өз жүйесі бар. Станция кезекшілері келетін пойызды алдын ала біліп, дайындықты бастайды. Олар пойызды қабылдаған сәттен бастап құжаттарын рәсімдеуге кіріседі. Сол мезетте пойыз құрастырушылар мен жүк қабылдап-тапсырушылар да өз жұмыстарына кірісіп, жүктің қауіпсіздігі мен құжаттардың дұрыстығын қамтамасыз етеді. Тауар конторының қызметкерлері әр жүктің құжатына мұқият қарап, қателікке жол бермейді. Ал парк кезекшілері тәулік бойы қай пойыз қай жолда, қай вагонға башмақ қойылғанын, қандай жөндеу немесе жоспарлы жұмыс барын анықтап, дер кезінде хабарлап отырады.

Міне, осылайша Шиелі станциясында әр минут есепте, әр сәт жауапты. Мұндағы әрбір қызметкер өз еңбегін жоғары бағалайды.