ҚТЖ-ны трансформациялау жоспары таныстырылды
«Қазақстан теміржолшысы» газетінің тілшісі
ҚР Үкіметі отырысында Индустрия және инфрақұрылымдық даму министрі Қайырбек Өскенбаев «Қазақстан темір жолы» ұлттық компаниясын трансформациялау бойынша алдағы жоспарлармен бөлісті.
Сала министрінің айтуынша, «ҚТЖ» ҰК» АҚ-ны ұлттық көліктік-логистикалық компанияға трансформациялау шеңберінде бірқатар жайттар ұсынылып отыр. Атап айтқанда, құжаттармен үздіксіз алмасуды, халықаралық нарықтарға қолжетімділікті қамтамасыз ететін «Бірыңғай цифрлық дәліз» құра отырып, «тар жерлерді» жою, үйлестіру арқылы әлемдік көлік-логистикалық компаниялармен бірігу; PSA-мен бірлесіп көлік дәліздерін цифрландыру; сондай-ақ, Иран, Әзербайжан, Грузия және Түркия порттарында сыртқы терминалдық дәліздер құру іске аспақ.
Сонымен қатар корпоративтік шешімдерді қабылдауға, тарифтік саясатты келісуге және операциялық қызметті арттыруға қатысу арқылы «ҚТЖ» ҰК» АҚ-ның операциялық қызметінде мемлекеттік реттеуді күшейту жоспарланған. Сондай-ақ, көлік-логистика саласын одан әрі дамыту үшін ғылыми-қолданбалы әзірлемелердің ұлттық базасын құруға ниетті. Аталған іс-шараларды іске асыру Қазақстанның 2030 жылға дейінгі көлік-логистикалық әлеуетін дамыту тұжырымдамасында бекітілмек.