Әзербайжанның Зиря портынан алғашқы пойыз жөнелтілді
Әзербайжан темір жолдары (ADY) ұзындығы 21 км болатын Дюбенді – Зиря – Гүрген – Зиря порты желісін қайта құру жобасын аяқтады. Жоба аясында Каспий теңізінің жағалауында орналасқан Гүрген – Зиря порты арасындағы 9 шақырымдық жаңа учаске салынды, деп хабарлайды Rail-news.kz.
Қайта құру жұмыстарының аяқталуы Зиря портын алғашқы пойыздың жөнелтілуімен белгіленді. Ол Орталық Азиядан Еуропаға күкірт тасымалдап барады. Бастапқы кезеңде 13 мың тонна күкірт жіберіледі, ал болашақта порт арқылы ай сайын 60 мың тоннаға дейін күкірт жөнелту жоспарланып отыр. Сондай-ақ порт инфрақұрылымын кеңейтіп, өңделетін жүктердің көлемі мен түрлерін арттыру, соның ішінде карбамид тасымалын ұйымдастыру көзделген.
Бұл темір жол желісінің іске қосылуы Әзербайжанның Транскаспий халықаралық көлік бағытының (ТКХБ) маңызды бөлігі ретіндегі рөлін нығайтады. 2024 жылы Әзербайжан темір жолдары арқылы 18,5 млн тонна жүк тасымалданған, оның ішінде транзиттік жүктер көлемі 7,3 млн тоннаға жетіп, 2023 жылмен салыстырғанда 5,7 %-ға артқан.