Пәкістанда содырлар жолаушылар пойызына шабуыл жасап, 450 адамды кепілге алды
Пәкістанның оңтүстік-батысында қарулы сепаратистер Jaffar Express жолаушылар пойызына шабуыл жасады, деп хабарлайды Rail-news.kz.
Оқиға Кветтадан Пешаварға бағыт алған пойыздың жолында болған. Шабуылдаушылар пойызға оқ атып, теміржолды жарып жібергеннен кейін, пойыз туннельде тұрып қалған. Машинист ауыр жарақат алды.
Reuters агенттігінің хабарлауынша, қарапайым жолаушылар босатылған, ал кепілде Пәкістан армиясының әскери қызметкерлері мен демалыста жүрген күш құрылымдарының қызметкерлері қалған.
Соңғы мәліметтерге сәйкес, шабуылға жауапкершілікті Белуджстан азаттық армиясы (BLA) өз мойнына алған. Олар егер пәкістандық күштер бұл аймақтан кетпесе, кепілге алынғандарды өлтіреміз деп мәлімдеді. Сонымен қатар, BLA шабуыл кезінде 20 әскери қызметкердің көз жұмғанын және бір ұшқышсыз аппаратты атып түсіргенін хабарлады. Бұл ақпараттар ресми түрде расталған жоқ.