Ресей темір жолы жаңа капсулалы вагондарды таныстырды
Ресей темір жолы (РЖД) үйреншікті плацкарт пен купеге балама болатын бір кісілік капсулалы вагондардың жобасын көрсетті. Жаңа формат жеке жайлылық пен қолжетімді бағаға негізделген, деп хабарлайды Rail-news.kz.
Мұндай вагондар алғаш рет бағыттарға 2028 жылға қарай шығады, ал әзірге компания вагондар паркін жаңартуға дайындалып жатыр.
РТЖ жолаушылар үшін мүлдем жаңа форматтағы — бір кісілік жеке купелері бар капсулалы вагондарды дайындады. Бұл шешім алыс сапарға шығу туралы түсінікті өзгертуі мүмкін, себебі енді әр жолаушының өз жеке кеңістігі болады.
Әр капсулалы вагонда екі қабатты болып орналасқан 56 жеке орын қарастырылған. Капсула жан-жағы тұйықталған әрі дыбыс өткізбейтін кеңістік, бұл өзге жолаушылардан бөлек, тыныш демалуға мүмкіндік береді. Ішінде жарықтың екі режимі (жұмсақ және кітап оқуға арналған жарық), розетка, USB-порттар, жиналмалы үстел, аяқ жағында жүк салатын орын және жеке климат-бақылау жүйесі бар. Мұндай формат жеке кеңістікті қалайтын және купеге қарағанда ақша үнемдегісі келетіндер үшін таптырмас нұсқа.
Капсулалы вагондар бірден пайда бола салған жоқ. 2026 жылдың өзінде-ақ теміржол бағыттарына стандартты вагондардан гөрі кеңірек әрі ұзынырақ келетін жаңа «Т» өлшемді вагондар шыға бастайды. Оларда ұйықтайтын орындар ұзарып, бөлімдер саны артады. Ал осы платформа негізіндегі капсулалы вагондар 2028 жылға қарай ғана қатынай бастайды.
Жаңа формат, ең алдымен, жалғыз саяхаттайтындарға арналған. Балалы отбасыларға, топ болып жүретін достарға немесе жүгі көп жолаушыларға капсула ыңғайсыз болуы мүмкін, өйткені ол тек бір адамға ғана есептелген. Дегенмен, оңаша жүруді ұнататындар үшін бұл нағыз жаңалық болмақ.