Өзбекстанда тағы екі бағытта жоғары жылдамдықты пойыздар қатынайды
Өзбекстан жоғары жылдамдықты теміржол желісін кеңейтуді жалғастырып жатыр. Ел астанасы Ташкенттен Әндіжан мен Термезге қатынайтын жаңа жоғары жылдамдықты пойыздарды іске қосу жоспарланып отыр деп хабарлайды Rail-news.kz.
Осы мақсатта Оңтүстік Кореяда «Узбекистон темир йуллари» АҚ мен Көлік министрлігінің өкілдері Hyundai Rotem компаниясымен келіссөздер өткізіп, сегіз заманауи электрпойызды жеткізуге арналған техникалық талаптарды келісті. Жаңа құрамдар таулы аймақтарда, құмды дауыл мен +44 градусқа дейінгі аптап ыстықта жұмыс істеуге бейімделеді.
Жаңа бағыттар елдегі жоғары жылдамдықты теміржол желісін дамыту бағдарламасының жалғасы болмақ. Биыл Ташкент – Шахрисабз және Ташкент – Хиуа бағыттарында да жүрдек пойыздар қатынай бастады. Сонымен қатар, Ташкент пен Самарқанд арасындағы алғашқы толыққанды жоғары жылдамдықты магистральдің құрылысы қолға алынған. Жоба жүзеге асқаннан кейін екі қала арасындағы жол жүру уақыты қазіргі 2,5 сағаттан 1,5 сағатқа дейін қысқарады.
Туризм саласы мамандарының пікірінше, жоғары жылдамдықты пойыздар ішкі туризмді дамытуға серпін беріп, өңірлер арасындағы қатынасты жеңілдетеді. Бүгінде мұндай пойыздар Өзбекстанның жаңа көлік брендіне айналып келеді.