Қытай теңіз бағыттары үшін контейнерлерді екі қабатпен таситын алғашқы пойызды іске қосты
Қытайда жартылай биік контейнерлерді екі қабаттап тасымалдап, ары қарай теңіз көлігіне тиеуге арналған елдегі алғашқы теміржол жобасы іске қосылды. Бұл туралы Қытайдың Орталық теледидары мәлімдеді, деп хабарлайды Rail-news.kz.
Алғашқы пойыз Ішкі Моңғолиядағы Баотоу қаласынан Хэбэй провинциясындағы Хуанхуаган портына қарай жолға шықты. Жаңа бағыт «теміржол - теңіз» схемасы бойынша сусымалы жүктерді бүкіл жол бойы контейнерлерді ауыстырмай әрі ашпай тасымалдауды көздейді.
Тасымал үшін стандартты биіктігі 2,6 метрлік контейнерлердің орнына биіктігі 1,7 метр болатын жартылай биік контейнерлер қолданылады. Бұл оларды теміржол платформаларына екі қабаттап орналастыруға мүмкіндік береді.
Жаңа технология тасымал тиімділігін арттырып, тиеу-түсіру операцияларының санын азайтады деп күтілуде. Қытай тарапының бағалауынша, бұл көлік шығындарын 25%-дан астамға қысқартуға мүмкіндік береді.
Осылайша, Қытайда жүкті жөнелту пунктінен соңғы межеге дейін бір контейнермен жеткізуге мүмкіндік беретін «теміржол - теңіз» логистикасының жаңа форматы пайда болды.