Қытайдан Еуропаға қатынайтын жүк пойыздары биыл 10 мың рейс жасаған
21 тамыздағы жағдай бойынша Қытайдан Еуропаға жөнелтілген жүк пойыздар рейсі 10 мыңға жетті. Өткен жылмен салыстырғанда тасымалдаушылар бұл көрсеткішті 10 күнге ерте орындаған, деп хабарлайды Rail-news.kz.
Қытай теміржолшыларының мәліметінше, жүк тасымалының көлемі 972 мың TEU жеткен, бұл былтырғыдан 5% артық.
Пойыздар Еуропадағы 24 елге, нақтырақ айтсақ 200 қалаға 82 бағытпен жеткізіледі. Ал, тасымалданатын жүктердің түрі 50 мыңнан асады, оның ішінде автокөлік пен бөлшектері, киім-кешек пен аксессуарлар, астық пен ағаш өнімдері де бар.
Қытай Еуропамен байланыста пойыздардың өткізу қабілетін арттыруға, ел ішіндегі көлік инфрақұрылымын жаңартуға және серіктес елдермен инфрақұрылымдық қызметті үйлестіруге айтарлықтай күш салып келеді.
Қытайдың Еуропа елдеріне жүк пойыздарын жеткізетін негізгі үш бағыты бар. Мәселен, Транссібір темір жолына шығатын шығыс бағыттағы жүк тасымалы 2020 жылдың сәйкес кезеңімен салыстырғанда 41,3%-ға өскен. Моңғолия арқылы өтетін орталық бағытта – 15,2 % артса, батыс бағыт Қазақстан арқылы өтетін жүк тасымалы 20,7 % өскен.