«Сұңқар» жүк кемесі сапарға шығады
«Қазақстан теміржолшысы» газетінің тілшісі
Ақтау портынан «Сұңқар» атты жаңа контейнер тасу кемесі сапарға шығады. Бұл Транскаспий халықаралық көлік бағдарының мүмкіндіктерін толық игеру мақсатында қолға алынып отыр.
Қазақстан, Әзербайжан, Грузия, Түркия және басқа да елдердің көлік-логистикалық кешендері бойынша түрлі компаниялардың басын біріктіретін «ТХКБ» халықаралық қауымдастығы 2017 жылы ақпан айында құрылған. 2019 жылдың басында «ҚТЖ» ҰК» АҚ мен «ҚазМұнайГаз» АҚ, сонымен қатар «Қазтеңізкөлікфлоты» ҰТКҚК-ның еншілес компаниялары мен KTZ Express Shipping АҚ арасында бас келісімге қол қойылып, соның аясында ҚТЖ «Қазтеңізкөлікфлоты» компаниясына 4 құрғақ жүк тиейтін кемесін ұзақ мерзімді жалдауға берді.
Аталған бағдар бойынша 2020 жылдан тұрақты өсім басталды. Бүгінде жылдық көлем жылына жиырма футтық эквивалентпен есептегенде 20 мың контейнерді құрап отыр, осылайша бұл көрсеткіш 2019 жылмен салыстырғанда бірнеше есеге артқан.
Бағдардың өткізгіштік қабілетінің артқанын көрген Қазтеңізкөлікфлоты 2021 жылы наурызда дәл осы бағыт үшін «Барыс» кемесін арнайылап қайта жабдықтап, бұрын жоғары габаритті жүк тасымалына арналып келген кемені контейнер таситын кеме ретінде пайдалануға көшті. Елімізде контейнер тасу бойынша мамандандырылған бірінші кеме болып саналатын «Барыс» Каспий үшін рекордты көрсеткіш саналатын 350 ЖФЭ жүкті бортында қабылдай алады. Ақтау портындағы контейнерлік хаб құру, теңіз флотын нығайту, теңіз тасымалын дамытуға Мемлекет басшысы тарапынан ерекше көңіл бөлініп отыр.
Бүгінде «Сұңқар» кемесін жаңғырту жұмыстары аяқталды, жуырда екінші контейнер тасымалдаушы кеме бірінші рейсіне шығады деп күтілуде. Бұл ҚТКФ флотының қуатын жылына 30 мың ЖФЭ-ге дейін арттыруға мүмкіндік береді. Қазтеңізкөлікфлоты енді үшінші кеме «Бүркітті» контейнер тасымалдауға лайықтап өзгерту жұмыстарына кіріседі, ол жұмыстарды келесі жылдың бірінші тоқсанында аяқтамақ.