9 айда ҚТЖ желісінде 190 млн тонна жүк тиелді

«ҚТЖ» ҰК» АҚ желісінде ағымдағы жылдың қаңтар-қыркүйегінде 190 млн тонна жүк тиелді. Өткен жылдың сәйкес кезеңімен салыстырғанда бұл көрсеткіш өзгеріссіз қалды, деп хабарлайды Rail-news.kz.

Қазақстан бойынша 126,5 млн тонна, ал экспортқа 63,5 млн тонна жүк тасымалданды. Республикаішілік тасымалдар өткен жылдың сәйкес көрсеткішімен салыстырғанда 2,4%-ке өсті.

Тас көмірдің 79,5 млн тоннасы тиелсе, бұл өткен жылдың тоғыз айы деңгейінен 3,7%-ке жоғары. Қазақстан бойынша қатты отынды тиеу осы кезеңде 2%-ке, яғни 54,6 млн тоннаға дейін ұлғайды.

Астықтың 6 млн тоннасы тасымалданса, оның ішінде экспортқа – 4,6 млн тонна. Бұл ретте ұнтақ өнімдерін (ұнды) тиеу өткен жылға қарағанда  16%-ке, яғни 1,9 млн тоннаға дейін, оның ішінде экспортқа – 33%-ке, яғни 1,3 млн тоннаға дейін өсті.

9 айда химиялық тыңайтқыштарды тиеу 4%-ке (3 млн.тоннаға дейін), мұнай жүктерін тиеу 6%-ке (13,8 млн тоннаға дейін), құрылыс жүктерін тиеу 2,6%-ке (12,2 млн тоннаға дейін) ұлғайды.