«Жетіген» терминалы бір сәтте 8 мың контейнерді сақтауға қауқарлы

 «Жетіген» көлік-логистикалық орталығының техникалық директоры Әнуар Мұсаев бүгін БАҚ өкілдерімен кездесу барысында орталықтың қазіргі атқарып жатқан қызметі жайлы айтып берді.

«Жетіген» көлік-логистикалық орталығы Алматы облысындағы Жетіген ауылы маңында орналасқан. Былтыр Алматы облысы бөлінгеннен кейін "Жетіген" көлік-логистикалық орталығын құру жобасы қолға алынған болатын. Нысан "ҚТЖ" ҰК" АҚ темір жолдар желісі бойынша Қытаймен Халықаралық шекараға жақын орналасуының арқасында жүк тасымалы үшін неғұрлым тиімді көліктік және логистикалық инфрақұрылымды қамтамасыз етуге қабілетті.

Әнуар Мұсаевтың айтуынша, қазір орталық құрылысының алғашқы кезеңі аяқталуға жақын. Логистикалық терминалда қазіргі сәтте 6 шақырымды темір жол желісі тартылып, іске қосылған. Құрылыстың екінші кезеңі бойынша тағы 7 шақырымды темір жол желісі тартылады.  

Сондай-ақ терминал аумағында 5 мың шаршы метрді құрайтын жүктерді уақытша сақтау қоймасы бар. Кәсіпорынның басымдығы Қазақстанның басқа өңірлері мен жақын маңдағы ТМД, Оңтүстік-Шығыс Азия және Таяу Шығыс елдері үшін қолжетімділіктің жоғары деңгейіне қол жеткізу болып табылады. Осылайша, "Жетіген" көлік-логистикалық орталығы экономиканың дамуына және Қазақстанның әлемдік экономикадағы бәсекеге қабілеттілігін арттыруға ықпал ете отырып, өңірлік және халықаралық көлік қатынасында маңызды рөл атқарады.

«Терминалды дамыту бағдарында «А» классты қоймалар салу жоспарланған. Сондай-ақ Еуропалық барлық стандарттарға сай келетін тиеу/түсіру кешені салынады. Қазір терминал бір сәтте 8 мың контейнерді сақтауға қауқарлы. 2024 жылы Индустриялды аймақ ретінде терминалға тағы 10 гектар жер телімі бөлінбек. Ол жерде минералды тыңайтқыштар мен ауыл шаруашылық өнімдерін өңдеу іске асырылады», – дейді Ә.Мұсаев.  

Терминал осы жылдың 2 мауысымында ашылған, қазір 100-ге жуық контейнер қойылған, алайда олардың барлығы бос. Әзірге терминал уақытша сақтау қоймасы ретінде  қолданылуда.  

«Бүгін біз 60-қа жуық контейнерді тиеп, жолға аттандырамыз. Біз жүктерін сақтақтағысы келетіндердің барлығына қызмет көрсетеміз, яғни жабық және ашық қоймаларды ұсына аламыз», – деп атап өтті директор.  

Терминалдың алғашқы кезеңі бойынша 100 адам жұмыспен қамтылса, кешен құрылысы толық аяқталғанда 300-ден астам адам тұрақты жұмыспен қамтылмақ. Бұл осы елдімекеннің әлеуметтік-экономикалық жағдайы мен инвестициялық тартымдылығына оң әсер ететіні сөзсіз.  

Аталған терминал Қытайдан Шығыс Еуропа бағытындағы транзиттердің барлығына қызмет көрсетеді. Кешен толық аяқталған соң жылына 100 мың контейнерді өңдей алады. Терминал тұрмыстық техника, ауыл шаруашылық өнімдері, автокөлік, қара металл және басқа тауар түрлерін сақтап, жеткізбек.