Теміржолшылар биылғы көмір тасымалына қамданып жатыр

Ел шығысындағы теміржолшылар алдағы қысқы маусымға даярлық шаралары аясында көмір тасымалын ұйымдастыру ісін бастап кетті. Бұл орайда бөлімше басшысы Владимир Бабиченконың тікелей бұйрығымен арнайы жедел штаб құрылды.

Штаб мүшелерінің арасында бөлімше басшысының бірінші орынбасары Қуаныш Әміренов және Дегелең, Жаңа-Семей, Жаңғызтөбе, Аягөз, Риддер және Жаңа-Өскемен, т.б. станциялардың басшылары бар. Жедел штаб өз жұмысын қазіргі күннің өзінде шұғыл түрде бастап кетті. Олар жергілікті атқарушы орган өкілдерімен бірлесіп тұрғындар үшін жеңілдікпен берілетін көмір алатын кірме жолдардың аудитін жүргізуде.  

Жалпы, жазғы мезгілде ерте басталатын қатты отын тасымалына ұлттық компания үлкен даярлықпен кіріспек. Мәселен, өткен жылы ҚТЖ бойынша 22 мың жартылай вагонның 19 мыңы көмір тиеуге берілген болатын. Ал ағымдағы жылы қыркүйек айының басында жартылай вагондардың саны 25 мың болмақ. Оның шамамен 20-21 мыңы қатты отын тасымалдауға жұмылдырылатын болады. Бұл 10 пайызға көп.  

Дегенмен биылғы жылы жедел штаб мүшелерінің алдындағы жауапкершілік біршама жоғары болып тұр. Осы ретте алдағы уақыттардағы атқарылатын жұмыстардың жоспары жасалынып, егжей-тегжейлі міндеттер қатары нақтыланды. Атап айтсақ, барлық станциялардың басшылары бөлімшенің логистика және жүк тасымалын ұйымдастыру бөліміне әр тәулік сайын көмір тұйықтарындағы, жылу қазандықтарындағы көмір қоры жайында таблица түріндегі есеп өткізіп отыруы керек. Сонымен қатар олар әрбір селекторлық кеңес барысында көмір тиеудегі қиындықтар мен босаған вагондарды жинап алудағы проблемалар жайында баяндап отырулары қажет. Бұл орайда бірінші класты Дегелең станциясының бастығы Талғат Башировке жүктелер міндет жоғары болмақ.  

Десек те, міндеттемелердің ең маңыздысы логистика және жүк тасымалын ұйымдастыру бөлімінің мамандарына жүк жіберуші «ВостокУгольПром» ЖШС-нің қызметкерлерімен тығыз жұмыс істеу қажеттігі болып отыр. Оларға биылғы жылыту маусымында арнайы ұйымдастырылған маршруттар бойынша қатты отын жөнелту көлемін арттыру, «Қазтеміртранс» АҚ вагондарының айналымын біртіндеп жоғарылату сынды тың міндеттер жүктелді. Бұл орайда бастапқы және соңғы операциялар бойынша арнайы жұмыс жоспары құрылмақ.  

Қорыта айтқанда, жедел штаб жүргізетін жұмыстың басты мақсаты алдағы 2023-2024 жылдардағы жылыту маусымында көмір тиеу мен түсіру жұмысын тұрғындар үшін, бюджеттік мекемелер үшін және жылумен қамтушы мекемелердің нормативті көмір қорының болуы үшін кедергісіз жүргізу болмақ. Сондай-ақ Семей және Өскемен өңірі теміржолшылары бұрынғыдай бөлек емес, осы жолы бірлесіп жұмыс жүргізетін болады.