ҚТЖ көмір тасымалдауға басымдық береді
2023-2024 жж. жылыту маусымына дайындық кезеңінде мамыр айынан бастап Қазақстан бойынша темір жол көлігімен 21 млн тонна тас көмір тасымалданды, деп хабарлайды Rail-news.kz.
Оның 18,7 млн тоннасы еліміздің жылу электр орталықтарына жеткізілсе, бұл өткен жылдың сәйкес кезеңімен салыстырғанда 300 мың тоннаға артық. Тұрғындар үшін 2,3 млн тонна қатты отын жеткізілді, бұл жылыту маусымының басында қалыптасқан өңірлердің қажеттілік жоспарына сәйкес келеді. Бұл туралы ОКҚ алаңында жылыту маусымына дайындық және коммуналдық-тұрмыстық сектор мен тұрғындарды көмірмен қамтамасыз етуге арналған брифинг барысында «ҚТЖ - Жүк тасымалы» ЖШС Бас директорының орынбасары Нұржан Келбұғанов айтып берді.
«ҚТЖ-да көмірді үздіксіз және біркелкі тасымалдауды қамтамасыз етудің Жол картасы іске асырылуда. Қатты отынды тасымалдауды үйлестіру жөніндегі жедел штаб белсенді жұмыс істейді, ол жүк жөнелтушілердің өтінімдерін қамтамасыз етуді, вагондар айналымының орындалуын бақылайды, ЖЭО қоймаларындағы қатты отын қорының қалдықтарына мониторинг жүргізеді», - деп атап өтті Н. Келбуғанов.
ЖЭО-дағы көмірдің жиынтық қоры 4,3 млн тоннадан астамды құрайды. Барлық дерлік энергия көздерінде отын қоры бекітілген нормадан жоғары, кейбіреулерінде 1,5-2 есе жоғары. Алайда қоймаларда көмір қоры нормативтік деңгейден төмен бірнеше ЖЭО бар. Бұл Көкшетау Жылу, Петропавл ЖЭО, Риддер ЖЭО, Кентау Энерго. Жағдай кәсіпорындардың көмір разрездері алдындағы қарызынан туындады. Көмірдің біркелкі жиналмауы жылыту маусымының ең жоғары кезеңдерінде тасымалдардың қоюлануына және қауіпті жағдайлардың туындауына әкелуі мүмкін.
Күзгі-қысқы кезеңде көмір тасымалдауға «Қазтеміртранс» АҚ-ның 22 мыңға жуық жартылай вагондарын тарту жоспарлануда, бұл өткен жылыту маусымына қарағанда 2 мың вагонға артық. Биыл 47 заманауи жүк локомотиві сатып алынды, жыл соңына дейін 97 локомотив жеткізіледі деп күтілуде, бұл соңғы жылдары ҚТЖ үшін тартқыш жылжымалы құрамды ауқымды сатып алу болып табылады және теміржол көлігінің тұрақты жұмыс істеуіне елеулі үлес қосады. Тәулік сайын 700-ге жуық жүк локомотиві пайдалануда, бұл нормативтік қажеттілікке сәйкес келеді.