Қыркүйекте ҚТЖ желісімен 29 млн тонна жүк тасымалданбақ

Осы жылдың қыркүйегіне ҚТЖ желісі бойынша 29 млн тоннаға жуық жүк тасымалдауға негізгі жоспар жарияланды. Бұл ретте, тамыз айында 26 млн тоннадан астам тасымалданды, бұл өткен жылдың сәйкес көрсеткішінен 8% -ке жоғары. 

Біркелкі тасымалдауды қамтамасыз ету үшін Ұлттық тасымалдаушы жүк жөнелтушілерді тасымалдауды нақты жоспарлауға шақырады.

Жүктерді тасымалдау қағидаларында жүктерді тасымалдауды жоспарлаудың 2 түрі көзделген: тасымалдауды айлық жоспарлау (негізгі жоспар) және жоспардан тыс тасымалдау (қосымша жоспар).

Теңіз порттары мен құрлықтағы шекаралық өткелдер арқылы «үшінші елдерге» тасымалдау кезінде өтінімдер жоспарланған ай басталғанға дейін 20 күн бұрын беріледі. ТМД елдеріне, Литваға, Латвияға, Эстонияға және Қазақстан Республикасы бойынша облысаралық қатынаста тасымалдау кезінде негізгі жоспар бойынша өтінімдер жоспарланған ай басталғанға дейін 14 күн бұрын қабылданады.

Автоматтандырылған жүйе бойынша өтінімдер алдағы айға тасымалдау көлемін келісу үшін Теміржол көлігі жөніндегі орталық кеңеске (ТМД және Балтық елдеріне қатысушы елдердің Теміржол көлігі мәселелеріндегі уәкілетті орган) беріледі.

 ҚТЖ «Узбекистон темир йуллари» АҚ-мен жүк тиелген құрамдарды қабылдауды арттыру бойынша келіссөздер жүргізді. Қазіргі уақытта бірқатар өтінімдер Өзбекстан, Түрікменстан, Тәжікстан теміржол әкімшіліктерінде келісілуде.

Жүкті тасымалдаудың қосымша жоспарлары белгіленген тәртіппен қаралатын болады. Тасымалдаушы теміржол желісінің өткізу қабілеттілігінің шектеулі болуына және басқа да себептерге байланысты қосымша жоспарларды келісуден бас тартуы мүмкін. Бас тартудың барлық жағдайлары бойынша жүк жөнелтушілер хабардар етіледі.