Контейнерлік пойыздардың артықшылығы көп – Alstom компаниясы
"Қазақстан теміржолшысы" газетінің тілшісі
Контейнерлік вагон жеңіл, сол себепті оған күші аз локомотивтер керек. Бұл жүк тасымалының бағасын төмендетуге әсер етеді. Бұл туралы Alstom компаниясының Батыс және Орталық Азия бойынша басқарушы директоры Жером Бойе TransLogistica Kazakhstan-2024 көрмесі аясында өткен конференцияда айтты.
Жером Бойенің айтуынша, контейнерлік пойыздардың артықшылығы көп. Олар біріншіден жеңіл, сол себепті жол бойындағы пойыздардың ара қашықтығы қысқарады.
«Мәселен, мұндай пойызбен жүкті аз тасуымыз мүмкін, бірақ пойыздар жиі қатынайтын болады. Контейнерлік вагон жеңіл және оған артылатын жүк те жеңіл болатын болса оған ықшамдалған күші аз локомотивтер керек. Мұның барлығы тасымал тарифін төмендетуге әсер етеді, яғни ондай жағдайда төленетін құн да төмен болу керек. Alstom компаниясында мұндай тәжірибе бұған дейін болған. Біз 6 ості локомотивтерді құрастырғанбыз. Қазақстандағы біздің өндіріс орнымызда мұндай локомотивтерді өндіруге барлық мүмкіндігіміз бар. Күші аз пойыздардың тасымал құны да төмен болады. Қажеттілік болса біз оны жасауға әзірміз», - деді Alstom өкілі.
Ол сондай-ақ жергілікті мамандарды үйрету бойынша оқу орындарының студенттерімен бірлесіп жұмыс атқарып жатқандарын айтты.
«Бізде бірнеше оқу орнымен келісім жасалған. Қазір бізде дыбыстық белгі беру құрылғыларын орнату бойынша оқу орынның студенттерімен жұмыс жүріп жатыр. Одан бөлек зауыттың өзінде жергілікті мамандармен тәжірибе алмасып, оқу-жаттығу жұмыстарын ұйымдастырамыз. Бұл мамандар тек Қазақстанда ғана емес, Alstom компаниясының өзге елдердегі өндіріс орнында жұмыс істей алады. Сол себепті біз ерлер мен қатар әйел жұмысшыларды да оқытып, біліктіліктерін арттырудамыз», - деді Жером Бойе.
Айта кетсек, бүгін Астанада көлік саласына арналған TransLogistica Kazakhstan-2024 көрмесі өз жұмысын бастады. Көрме аясында бүгін «Қазақстанда теміржол көлігі мен инфрақұрылымды дамыту» және «BreakBulkKazakhstan ірі және ауыр жүктерді тасымалдау» тақырыптарында конференциясы өтті.
Қазанның 11-не дейін жалғасатын көрмеге 18 елден 180 компания қытсуда.