Қытай – Қазақстан – Түрікменстан – Иран теміржол дәлізі жанданады
2025 жылғы қыркүйек айының басында өткен келіссөздер барысында Түркіменстан мен Иранның көлік ведомстволарының басшылары шекарааралық тасымалдарда жүк транзитін жылына 20 млн тоннаға дейін ұлғайту үшін бірлескен іс-қимыл және шаралар жол картасын әзірлеуге уағдаласты. Оның ішінде 6 млн тоннаға дейінгі көлем теміржол көлігімен тасымалданатын болады, деп хабарлайды Rail-news.kz.
Иран тарапы Қытай — Қазақстан — Түркіменстан — Иран теміржол дәлізін қалыптастыруды жандандыруды ұсынды. Бұл жоба 2006 жылы Ауғанстан, Әзербайжан, Иран, Қазақстан, Қырғызстан, Пәкістан, Тәжікстан және Түркия парламенттері ратификациялаған ECO Transit Transport Framework Agreement (TTFA) келісімі негізінде жүзеге асуда. Сондай-ақ, Орталық және Оңтүстік Азия елдерін Парсы шығанағымен байланыстыруды көздейтін «Ашхабад келісімі» халықаралық дәлізі де назарға алынды.
Тараптар Сарахс және Инче-Бурун шекара өткелдерінің өткізу қабілетін тәулігіне тиісінше 400 және 150 вагонға дейін арттыруға, «Солтүстік — Оңтүстік» халықаралық көлік дәлізі аясындағы транзиттік жүк ағынын көбейтуге, сондай-ақ Мешхед (Иран) — Мары (Түркіменстан) бағытындағы жолаушылар тасымалын қайта жандандыруға келісті.
Лотфабад шекара терминалының іске қосылуы және тарифтік жеңілдіктер транзиттік жүк ағынын тәулігіне 170–200 мың тоннаға дейін арттыруға мүмкіндік береді. Алдағы уақытта Сарахс шекара өткелінің инфрақұрылымын жаңғырту арқылы тележол ауыстыру қуатын тәулігіне 600 вагонға жеткізу жоспарлануда.
2025 жылғы мамырда қол қойылған және мемлекетаралық сауда көлемін жылына 3 млрд АҚШ долларына дейін ұлғайтуды көздейтін жол картасына сәйкес, Сарахс пен Лотфабадта еркін сауда аймақтарын құру қарастырылған.