Елімізде көлік логистикасы саласына қызығушы жастар саны көбейді
Қазақстанда соңғы жылдары көлік логистикасы саласына қызығушы жастар саны көбейді, , деп хабарлайды Rail-news.kz сайты 24kz-ке сілтеме жасап.
«Арнайы академиялар мен иституттардың ашылуы елдегі мамандыққа деген сұраныстың жоғары екенін көрсетеді», - дейді халықаралық сарапшылар. Орталық Азия көлік-логистика бірлестігінің дерегінше, қазір аймақта «логист» мамандары тапшы. Ал Қазақстанның жоғары оқу орындарын тәмамдаған студенттер Орталық Азиядағы сұранысты өтеуі мүмкін.
Қазақстан арқылы өтетін керуен легі жыл санап артып келеді. Ал халықаралық Транскаспий көлік бағыты елге ғана емес, Орталық Азия үшін үлкен олжалы жоба болды. Көрші мемлекеттер тауарларын Кәрі құрлыққа жеткізуге мүмкіндік алды. Нәтижесінде елге инвестиция тартылып, капитал көлемі артты.
- Орталық Азияда көлік логстикасына басымдық беріліп жатыр. Көрші мемлекеттер жүк тасымалын өрістету үшін дәліздерді ашуға мүдделі. Саланы цифрландыру бойынша да біраз жұмыстар атқарылуда. Өзбекстан басқа да дәліздер бойынша келіссөз жүргізіп жатыр. Оның ішінде Транскаспий халықаралық көлік бағыты арқылы Еуропа нарығына шығу көзделген, - дейді Өзбекстанның дамушы стратегия орталығының атқарушы директоры Эльдор Туяков.
Қазақстанның логистикалық мүмкіндігі артқан сайын мамандыққа деген сұраныстың өсуі заңдылық. Осы ретте жастардың салаға қызығушылық танытуы байқалады. Орталық Азиядағы көлік логистикалық бірлестігінің дерегінше жаңадан ашылған академиялар мен институттар Қазақстанға ғана емес, күллі аймаққа логист мамандардың жаңа буынын дайындап жатыр. Олар цифрлық саланы меңгерген, заманауи технологияның тілін білетін кәсіп иесі болмақ.
- Қазақстан логистикалық инфрақұрылымға ерекше ден қойып жатыр. Себебі оның пайдасы көл-көсір екенін түсінді. Болашақта бұл сала тіпті экономиканың қозғаушы күшіне айналуы ғажап емес. Қазақстанда логистика мамандығы бойынша академиялар мен институттар ашылып жатыр. Жастардың салаға деген қызығушылығы жоғары, - дейді Орталық Азиядағы көлік-логистикалық бірлестігі төрағасының орынбасары Наталья Андриевская.
Орталық Азия мемлекеттері логистикалық дәліздерді көптеп ашуға күш салып жатыр. Қытайдан Қырғызстан, Өзбекстан арқылы Түрікменстанды басып өтіп, Ауғанстанға шығатын темір жол жобасы қолға алынды. Бір кездері жабық болған мемлекеттер экономиканы алыс-беріссіз, барыс-келіссіз дамыту мүмкін емес екенін енді түсінгендей.