Қазақстан Арменияға ай сайын 20 мың тоннаға дейін астық жөнелтпек
Арменияның Армавир облысындағы Даларик теміржол станциясына Қазақстаннан шыққан алғашқы жүк пойызы келіп жетті. Құрамында 15 вагон бар пойыз 1 мың тонна бидай алып келген. Бұл туралы Азық-түлік келісім корпорациясы мәлім етті, деп хабарлайды Rail-news.kz.
Ұлттық астық операторының директоры Тобылбек Омаровтың айтуынша, енді Азық-түлік келісім корпорациясы Арменияға ай сайын 15 мыңнан 20 мың тоннаға дейін астық экспорттауды жоспарлап отыр.
Қазақстандық бидай тиелген пойыздар жаңадан қайта ашылған теміржол бағытымен – Ресей, Грузия және Әзербайжан арқылы өтеді.
Айта кетсек, бұған дейін LogiStan басылымы 2025 жылдың қараша айының басында Қазақстанның Азық-түлік келісім корпорациясы соңғы 30 жылда алғаш рет Арменияға Әзербайжан арқылы бидай жөнелткенін жазған болатын.