Транскаспий дәлізі бойынша Қытайдан келетін транзит 12%-ға артты
Биыл 10 айда Қытайдан ТХКБ бойынша 292 контейнерлік пойыз жөнелтілді, бұл өткен жылмен салыстырғанда 12%-ға артық, деп хабарлайды Rail-news.kz.
«Самұрық-Қазына» қорының мәліметінше, бұл динамикадағы маңызды элемент – терминалдар жүйесінің жолға қойылуы және Қытаймен логистиканың тиімді ұйымдастырылуы.
Соның ішіндегі басты нысан - Сиань қаласының құрғақ портындағы Қазақстан-Қытай терминалы. Жөнелтулердің едәуір көлемі осы жерде қалыптасады. 2024 жылы терминалдың іске қосылуы Қытайдан ТХКБ арқылы өтетін транзитті 33 есе арттыруға мүмкіндік берді.
Аталған бағыт бойынша Қазақстанның позициясын Ақтау портындағы контейнерлік хаб және Алматыдағы «ZHETYSU» логистикалық терминалы нығайтады.
ҚТЖ-ның елдің көлік-логистика және транзиттік әлеуетін арттыруға бағытталған жобалары «Самұрық-Қазына» қорының инвестициялық портфеліндегі басым бағыттардың бірі болып қала береді.